দেশদ্ৰোহ আইন বাতিল সন্দৰ্ভত আইন মন্ত্ৰীক সমালোচনা চিদাম্বৰমৰ

দেশদ্ৰোহ আইন বাতিল কৰাৰ বাবে গৃহ মন্ত্ৰালয়ৰ কোনো প্ৰস্তাৱ বিবেচনাধীন নাই বুলি উল্লেখ কৰি আইন মন্ত্ৰী কিৰেন ৰিজিজুক সমালোচনা কৰিছে জেষ্ঠ কংগ্ৰেছ নেতা পি চিদাম্বৰমে। ইয়াৰ পৰিৱৰ্তে এই আইনৰ অধীনত বহুতো নিৰীহ লোকক লক্ষ্য কৰাৰহে প্ৰস্তাৱ আছে বুলি কটুক্তি কৰে চিদাম্বৰমে।

উল্লেখ্য যে আইন মন্ত্ৰীজনে শুকুৰবাৰে লোকসভাত কৈছিল যে গৃহ মন্ত্ৰালয়ৰ ৰাজদ্ৰোহৰ সৈতে সম্পৰ্কিত ভাৰতীয় দণ্ডবিধিৰ (আইপিচি) ১২৪এ ধাৰা বাতিল কৰাৰ কোনো প্ৰস্তাৱ বিবেচনাধীন নাই।

উচ্চতম ন্যায়ালয়ে শেহতীয়াকৈ দেশদ্ৰোহী আইনক ঔপনিৱেশিক বুলি অভিহিত কৰিছে নেকি আৰু ইয়াৰ অপব্যৱহাৰ কৰা হৈছে বুলি পৰ্যৱেক্ষণ কৰিছে নেকি বুলি অসমৰ সাংসদ বদৰুদ্দিন আজমলে সোধা প্ৰশ্নৰ উত্তৰত ৰিজিজুৱে কয়, “ভাৰতৰ মাননীয় উচ্চতম ন্যায়ালয়ে প্ৰদান কৰা কোনো ৰায় বা আদেশত এনে কোনো পৰ্যৱেক্ষণ পোৱা হোৱা নাই।

লোকসভাত ৰিজিজুৰ লিখিত উত্তৰৰ প্ৰতিক্ৰিয়া ব্যক্ত কৰি চিদাম্বৰমে টুইট কৰে, “আইন মন্ত্ৰীয়ে কয় যে এমএইচএয়ে তেওঁক জনাইছে যে দেশদ্ৰোহ আইন (ধাৰা ১২৪এ) বাতিল কৰাৰ কোনো প্ৰস্তাৱ নাই। তেওঁ কোৱা নাছিল যে এম.এইচ.এ.-ৰ ওচৰত দেশদ্ৰোহ আইনৰ অধীনত বহুতো নিৰীহ লোকক বুক কৰাৰ প্ৰস্তাৱ আছে!”

ইয়াৰ পাছতে চিদাম্বৰমৰ টুইটসমূহ টেগ কৰি ৰিজিজুৱে প্ৰত্যুত্তৰ দি সুধিছিল যে কংগ্ৰেছ চৰকাৰে কিমান হাজাৰ ৰাজদ্ৰোহৰ গোচৰ মানুহৰ ওপৰত আৰোপ কৰিছিল।