ভাৰতৰ প্ৰধানমন্ত্ৰী নৰেন্দ্ৰ মোদীৰ চিঠিৰ কি প্ৰত্যুত্তৰ দিলে পাক প্ৰধানমন্ত্ৰী ইমৰাণ খানে?

ভাৰতৰ প্ৰধানমন্ত্ৰী নৰেন্দ্ৰ মোদীৰ চিঠিৰ উত্তৰ দিছে চিৰ বৈৰী ৰাষ্ট্ৰ পাকিস্তানৰ প্ৰধানমন্ত্ৰী ইমৰাণ খানে।

মংগলবাৰে পাক প্ৰধানমন্ত্ৰী ইমৰাণ খানে ভাৰতৰ প্ৰধামমন্ত্ৰী নৰেন্দ্ৰ মোদীৰ চিঠিৰ উত্তৰত শান্তিৰ বাৰ্তা প্ৰেৰণ কৰিছে।

উল্লেখ্য যে জন্মলগ্নৰে পৰা ভাৰতৰ বৈৰী ৰাষ্ট্ৰ হিচাপে পাকিস্তানে দীৰ্ঘদিন ধৰি ভাৰতৰ শান্তি বিঘ্নিত কৰি আহিছে।

কাশ্মীৰ সীমান্তত অনুপ্ৰৱেশৰ জৰিয়তে ভাৰতত সন্ত্ৰাসবাদ বিয়পোৱা বুলি ভাৰতে পাকিস্তানক জগৰীয়া কৰি আহিছে। কাশ্মীৰৰ বিবাদৰ ফলস্বৰূপে দুই দেশৰ মাজত একাধিকবাৰ মুখামুখি যুদ্ধও সংঘটিত হৈ গৈছে।

ইফালে বাংলাদেশ জন্মৰ বাবে ভাৰতক জগৰীয়া কৰি আহিছে পাকিস্তানে।

পাকিস্তানক সন্ত্ৰাসবাদৰ পৃষ্ঠপোষক বুলি অভিহিত কৰি ভাৰতে আন্তঃৰাষ্ট্ৰীয় পৰ্যায় তথা ৰাষ্ট্ৰসংঘতো নিন্দা কৰি আহিছে।

তেনে সময়তে ‘পাকিস্তান দিৱস’ উপলক্ষে ভাৰতৰ প্ৰধানমন্ত্ৰী নৰেন্দ্ৰ মোদীয়ে পাক প্ৰধানমন্ত্ৰী ইমৰাণ খানলৈ এখন পত্ৰ প্ৰেৰণ কৰি ভাৰতে পাকিস্তানৰ সৈতে সুসম্পৰ্ক আৰু শান্তি ৰক্ষা কৰি চলিব বিচাৰে বুলি উল্লেখ কৰিছিল।

মংগলবাৰে এই প্ৰত্ৰৰ প্ৰত্যুত্তৰ দিছে পাক প্ৰধানমন্ত্ৰী ইণৰাণ খানে।

“ভাৰতসহ প্ৰতিখন প্ৰতিৱেশী ৰাষ্ট্ৰৰ সৈতে শান্তিপূৰ্ণ সহাৱস্থান বিচাৰে পাকিস্তানৰ নাগৰিকে। দক্ষিণ এছিয়াৰ দেশসমূহৰ মাজৰ সম্পৰ্ক ভালে থাকিলে ভাৰত আৰু পাকিস্তানৰ মাজৰ সকলো ইছ্যু সমাধান কৰা সম্ভৱ। তাৰ মাজত জন্মু আৰু কাশ্মীৰৰ সমস্যাও অন্যতম।” পাক প্ৰধানমন্ত্ৰী ইমৰাণ খানে প্ৰত্ৰত এইদৰে উল্লেখ কৰিছে।

আনহাতে ক’ৰণাৰ বিৰুদ্ধে ভাৰতীয়সকলে কৰা যুদ্ধক অভিনন্দন জ্ঞাপন কৰিছে পাক প্ৰধানমন্ত্ৰী ইমৰাণ খানে।

স্মৰ্তব্য যে কিছুদিন পূৰ্বে তুৰস্কৰ ৰাজধানী ইষ্টানবুলত ভাৰত আৰু পাক বৈদেশিক মন্ত্ৰীয়ে সাক্ষাৎ কৰিছিল। অৱশ্যে পৃথকে দুয়ো দেশৰ বৈদেশিক মন্ত্ৰীয়ে মিলিত নহ’লেও ইয়াৰ পিছত দুই দেশৰ প্ৰধানমন্ত্ৰীৰ পত্ৰ প্ৰেৰণক কূটনৈতিক বিশেষজ্ঞ মহলে বিশেষ তাৎপৰ্যপূৰ্ণ বুলি অভিহিত কৰিছে।