‘পাকিস্তান ভাল ভাতৃ, চিপিইচি ক’ৰিডৰৰ ফলত সম্পৰ্ক অধিক শক্তিশালী হ’ব’-জিনপিং
চীনে ভাৰতৰ বিৰোধিতাৰ পাছতো পাকিস্তান অধিকৃত কাশ্মীৰৰ ওপৰেৰে অৰ্থনৈতিক ক’ৰিডৰ নিৰ্মাণ কৰিছে।
চীনৰ ৰাষ্ট্ৰপতি জি জিনপিঙে শুকুৰবাৰে এই প্ৰসংগত পাকিস্তানৰ প্ৰশংসাত পঞ্চমুখ হৈ পৰিছে।
জিনপিঙে এই ক’ৰিডৰে দুয়োখন দেশৰ সম্পৰ্ক অধিক শক্তিশালী কৰিব বুলি মন্তব্য কৰিছে।
পাকিস্তানৰ ৰাষ্ট্ৰপতি আৰিফ আলভিলৈ প্ৰেৰণ কৰা এটা বাৰ্তাত জিনপিঙে চীন-পাকিস্তান অৰ্থনৈতিক ক’ৰিডৰ (CPEC)ক এটা লেখতলবলগীয়া প্ৰকল্প বুলি অভিহিত কৰিছে।
তেওঁ কয়,’’পাকিস্তান আমাৰ ভাল ভাতৃ তথা সহযোগী। চীন-পাকিস্তানৰ মাজৰ সম্পৰ্ক চিপিইচি ক’ৰিডৰৰ ফলত অধিক শক্তিশালী হ’ব।‘’
চীনৰ হাইনান প্ৰদেশত বৃহস্পতিবাৰে দুইখন ৰাষ্ট্ৰৰ বিদেশ মন্ত্ৰী এক বৈঠকত মিলিত হৈছিল। ইয়াৰ পাছতে শুকুৰবাৰে জিনপিঙৰ বাৰ্তাটো পাকিস্তানৰ ৰাষ্ট্ৰপতিলৈ প্ৰেৰণ কৰা হয়।
ভাৰতৰ সাৰ্বভৌমত্ব প্ৰশ্ন জড়িত থকা চীনৰ ব্যয়বহুল ৱান বেল্ট ৱান ৰোড প্ৰকল্পৰ বিৰুদ্ধে ভাৰতে মাত মাতি আহিছে। ভাৰতে নিজৰ অৱিচ্ছেদ্য অংগ বুলি দাবী কৰি অহা পাকিস্তান অধিকৃত কাশ্মীৰৰ মাজেৰে এই পথ গৈছে।
বাণিজ্যিক দিশলৈ চাই এই প্ৰকল্পৰ জৰিয়তে চীনে এছিয়া, আফ্ৰিকা আৰু য়ুৰোপৰ কেইখনমান দেশৰ সৈতে স্থলপথেৰে সংযোগ স্থাপনৰ লক্ষ্য লৈ এই প্ৰকল্প আনিছে।