পাকিস্তানৰ কৰাচীত ভয়ংকৰ বিমান দুৰ্ঘটনা; আটাইকেইগৰাকী যাত্ৰীৰ মৃত্যুৰ আশংকা

লাহোৰৰ পৰা কৰাচীলৈ যাত্ৰা কৰা পাকিস্তান ইণ্টাৰনেশ্যনেল এয়াৰলাইনছৰ এখন যাত্ৰীবাহী বিমান আজি কৰাচী বিমান বন্দৰৰ সমীপত দুৰ্ঘটনাগ্ৰস্ত হয়।

জানিব পৰা মতে, দুৰ্ঘটনাগ্ৰস্ত বিমানখনত ৯৯ গৰাকী যাত্ৰী আৰু ৮ গৰাকী বিমান কৰ্মী আছিল।

দুৰ্ঘটনাগ্ৰস্ত বিমানখনৰ সকলো যাত্ৰীৰ মৃত্যু হোৱা বুলি সন্দেহ প্ৰকাশ কৰা হৈছে।

অৱতৰণৰ সময়ত বিমানখনৰ যাত্ৰিক বিজুতি ঘটি ওচৰৰ আৱাসগৃহত খুন্দা মৰাৰ ফলতে এই ভয়ংকৰ দুৰ্ঘটনা সংঘটিত হয় বুলি পাকিস্তানৰ সংবাদ মাধ্যমে কয়।

অৱতৰণৰ সময়ত বিমানখনে প্ৰচণ্ড শব্দ কৰি জ্বলি উঠে।

দুৰ্ঘটনাগ্ৰস্ত যাত্ৰীবাহী বিমানখন আজি দুপৰীয়া পাকিস্তানৰ লাহোৰ বিমান বন্দৰৰ পৰা কৰাচী বিমান বন্দৰ অভিমুখে ৯৯ গৰাকী যাত্ৰী আৰু ৮ গৰাকী বিমান কৰ্মী লগত লৈ উৰা মাৰিছিল।

বৰ্তমান দুৰ্ঘটনাস্থলীত কৰাচী আৰক্ষীৰ দল উপস্থিত হৈ উদ্ধাৰ অভিযান আৰম্ভ কৰিছে।

ঈদৰ পূৰ্বে পাকিস্তানত সংঘটিত হোৱা ভয়াবহ বিমান দুৰ্ঘটনাৰ খবৰে দেশখনত শোকৰ ছাঁ পেলাইছে।

উল্লেখযোগ্য যে, ক’ৰ’নাৰ সংক্ৰমণৰ বাবে বিমান পৰিবহন বন্ধ ৰখা পাকিস্তানে কিছু দিন পূৰ্বে বিমান যাত্ৰা আৰম্ভ কৰিছিল।

পাকিস্তানৰ বিমান দুৰ্ঘটনা সন্দৰ্ভত অসমৰ স্বাস্থ্য মন্ত্ৰী হিমন্ত বিশ্ব শৰ্মাই টুইটাৰ যোগে শোক প্ৰকাশ কৰে।