ঔষধৰ সংকটত হাহাকাৰ! ভাৰতৰ সৈতে বাণিজ্য বন্ধ কৰি নিজেই চাপত পাকিস্তান?

পেহেলগামত সংঘটিত হোৱা নৃশংস সন্ত্ৰাসবাদী আক্ৰমণৰ পিছত ভাৰত-পাকিস্তানৰ সম্পৰ্কৰ চৰম অৱনতি ঘটিছে। ভাৰতৰ কূটনৈতিক আক্ৰমণৰ পিছতে পাকিস্তানে প্ৰতিহত ব্যৱস্থা গ্ৰহণ কৰিছে।

নতুন দিল্লী আৰু ইছলামবাদৰ মাজত সকলো বাণিজ্যিক সম্পৰ্ক বন্ধ কৰাৰ কথা ঘোষণা কৰিছে পাকিস্তানে। তাৰপিছতে পাকিস্তানৰ ওপৰত যেন সৰগ ভাঙি পৰিল। ভাৰতৰ সৈতে বাণিজ্যিক সম্পৰ্ক শেষ হোৱাৰ বাবে পাকিস্তানৰ স্বাস্থ্য খণ্ডত তীব্ৰ চাপ পৰা বুলি জানিব পৰা গৈছে।

এই চিন্তা যে ভিত্তিহীন নহয় সেয়া পাকিস্তানত জিঅ’ নিউজৰ এক প্ৰতিবেদনৰ পৰা বহুলাংশে স্পষ্ট হৈ পৰিছে। আকস্মিকভাৱে বাণিজ্যিক সম্পৰ্ক বন্ধ হোৱাৰ ফলত পাকিস্তানত চিকিৎসা সংকটৰ সৃষ্টি হ’ব পাৰে বুলি দাবী কৰা হৈছে। ইয়াৰ পৰিপ্ৰেক্ষিতত পাকিস্তানৰ স্বাস্থ্য মন্ত্ৰালয়ে যোগানৰ সমস্যা ৰোধৰ বাবে জৰুৰী ব্যৱস্থা গ্ৰহণ কৰিছে।

কিয় সংকট আহিব? ঔষধৰ বাবে পাকিস্তান ভাৰতৰ ওপৰত বহু পৰিমাণে নিৰ্ভৰশীল। সেই দেশৰ প্ৰায় ৪০ শতাংশ ঔষধৰ কেঁচামাল ভাৰতৰ পৰা যায়। লগতে বিভিন্ন উন্নত ঔষধ যায়। এক্টিভ ফাৰ্মাচিউটিকেল ইনগ্ৰেডিয়েন্ট ভাৰতৰ পৰা পাকিস্তানলৈ যায়। ফলত বাণিজ্য বন্ধ হ’লে পাকিস্তানৰ ঔষধৰ যোগান ব্যাহত হ’ব পাৰে। বৰ্তমান পাকিস্তানে জলাতংক প্ৰতিৰোধী ভেকচিন, সাপৰ বিষ প্ৰতিৰোধী ভেকচিন, কৰ্কট ৰোগৰ ঔষধ আৰু বিভিন্ন ৰোগক লৈ চিন্তিত হৈ পৰিছে।

পাকিস্তানৰ ঔষধ নিয়ন্ত্ৰণ কৰ্তৃপক্ষই জনোৱা মতে, ইয়াৰ ফলত পাকিস্তানৰ ঔষধ খণ্ডত কি প্ৰভাৱ পৰিব সেই সন্দৰ্ভত কোনো বিজ্ঞপ্তি জাৰি কৰা হোৱা নাই। কিন্তু পৰিস্থিতি চম্ভালাৰ বাবে পদক্ষেপ লোৱাৰ খবৰ আহিছে।

 সংবাদ মাধ্যমৰ সূত্ৰ অনুসৰি সংস্থাটোৰ এজন বিষয়াই জনোৱা মতে, ২০১৯ চনৰ পিছত বিকল্প বিচাৰি উলিওৱাৰ কাম আৰম্ভ হৈছিল। এতিয়া পাকিস্তানে চিকিৎসাৰ বাবে চীন, ৰাছিয়া আৰু ইউৰোপৰ বিভিন্ন দেশৰ ফালে চাই হাত পাতি ৰৈছে।