পুনৰ চাৰ্জিকেল ষ্ট্ৰাইক! : পাকিস্তানী সেনাক সতৰ্ক হোৱাৰ নিৰ্দেশ; ভাৰতৰ প্ৰতিক্ৰিয়া কি?

পুনৰ ভাৰতৰ চাৰ্জিকেল ষ্ট্ৰাইকৰ আশংকাত শংকিত হৈছে নেকি পাকিস্তান! ইতিমধ্যে ভাৰতৰ পুনৰ চাৰ্জিকেল ষ্ট্ৰাইকৰ আশংকা কৰি পাকিস্তানে দেশৰ সৈন্য বাহিনীক সতৰ্ক হ’বলৈ নিৰ্দেশ দিছে।

এই দাবী পাকিস্তানী সংবাদ মাধ্যমৰ। পাক সংবাদ মাধ্যমৰ দাবী যে দিল্লীৰ কৃষক বিদ্ৰোহৰ পৰা দৃষ্টি ঘূৰাই আনি নৰেন্দ্ৰ মোদী চৰকাৰে হঠাতে পাকিস্তানক আক্ৰমণ কৰিব পাৰে।

পাক সংবাদ মাধ্যমৰ মতে যিকোনো সময়তে নিয়ন্ত্ৰণ ৰেখাত ভাৰতীয় সেনাই আক্ৰমণ কৰাৰ সম্ভাৱনা আছে। এই আশংকা কৰি ইতিমধ্যে পাক চৰকাৰে পাকিস্তানী সেনা বাহিনীক সতৰ্ক কৰি দিছে বুলিও পাক সংবাদ মাধ্যমে দাবী কৰিছে।

পাকিস্তানৰ আগশাৰীৰ সংবাদ প্ৰতিষ্ঠান জিঅ’ নিউজৰ মতে পাকিস্তানৰ আভ্যন্তৰীণ আৰু বৰ্হি দুয়ো দিশত ভাৰতে চাপ সৃষ্টিৰ বাবে এই আক্ৰমণ কৰাৰ সম্ভাৱনা আছে।

জিঅ’ নিউজৰ মতে লাডাখ আৰু ডুকলামত চীনৰ বিৰুদ্ধে ভাৰতীয় সেনাই পৰাস্ত হোৱাৰ পিছত এইবাৰ নতুন দিল্লীয়ে নিয়ন্ত্ৰণ ৰেখাত দৃষ্টি নিৱদ্ধ কৰিছে।

অৱেশ্যে এই বিষয়ে পাক চৰকাৰ অথবা সেনাবাহিনীয়ে চৰকাৰীভাৱে মুখ খোলা নাই। কিন্তু পাক সংবাদ মাধ্যমে পাক সেনাবাহিনীৰ এক সূত্ৰৰ উদ্ধৃতি দি এই বাতৰি পৰিৱেশন কৰা বুলি দাবী কৰিছে।

সেই সূত্ৰৰ উদ্ধৃতি দি পাক সংবাদ মাধ্যমে দাবী কৰিছে যে ভাৰতৰ কৃষকৰ কৃষকে বিদ্ৰোহ কৰি আছে আৰু সংখ্যালঘুক অত্যাচাৰ কৰা হৈছে। এইবোৰৰ পৰা বিশ্ব সম্প্ৰদায়ৰ দৃষ্টি বিপথে পৰিচালিত কৰিবলৈ মোদী চৰকাৰে চেষ্টা অব্যাহত ৰাখিছে।

“২০১৬ চনত কোনো প্ৰমাণ নোহোৱাকৈয়ে নিয়ন্ত্ৰণ ৰেখা পাৰ হৈ চাৰ্জিকেল ষ্ট্ৰাইক কৰা বুলি দাবী কৰিছিল ভাৰতে। ২০১৯ চনতো পাকিস্তানৰ বিৰুদ্ধে একেই পদক্ষেপ লৈছিল নতুন দিল্লীয়ে। কিন্তু সেয়াও ব্যৰ্থ হৈছিল।” পাক সংবাদ প্ৰতিষ্ঠান জিঅ’ নিউজৰ দাবী।

পাকিস্তানৰ সংবাদ মাধ্যমত প্ৰকাশিত এই খবৰ তথা আশংকাৰ সন্দৰ্ভত নতুন দিল্লীয়ে এতিয়াও কোনো প্ৰতিক্ৰিয়া প্ৰকাশ কৰা নাই।