এইবাৰ ভাৰতৰ পূবৰ পৰা আক্ৰমণ আৰম্ভ কৰাৰ ভাবুকি দিলে পাকিস্তানী সেনা প্ৰধান আছিম মুনিৰে
আমেৰিকাত এক অনুষ্ঠানত পাকিস্তানী সেনা প্ৰধান আছিম মুনিৰে কয় যে পাকিস্তানে এইবাৰ ভাৰতৰ পূব দিশৰ পৰা আক্ৰমণ চলাব। এনে পৰিস্থিতি স্বাভাৱিকতে প্ৰশ্ন উত্থাপন হয়, সেই ক্ষেত্ৰত পাকিস্তানে বাংলাদেশক ‘বেছ’ হিচাপে ব্যৱহাৰ কৰিব নেকি?
দ্য প্ৰিণ্টে প্ৰকাশ কৰা বাতৰি অনুসৰি, আমেৰিকাত এই অনুষ্ঠানত মুনিৰে কয়, ‘এইবাৰ আমি ভাৰতৰ পূব দিশৰ পৰা আৰম্ভ কৰিম। য’ত তেওঁলোকৰ সকলো গুৰুত্বপূৰ্ণ সম্পদ আছে। তাৰ পিছত আমি পশ্চিমলৈ যাম।’
প্ৰসংগক্ৰমে অপাৰেচন সিন্দুৰ স্থগিত ৰখাৰ কেইমাহমানৰ ভিতৰতে পাকিস্তান অধিকৃত কাশ্মীৰত পুনৰ সন্ত্ৰাসবাদী ঘাটি গঠন কৰা হৈছে। ইফালে শেহতীয়াকৈ দিল্লীত ধাৰাবাহিকভাৱে উচ্চ পৰ্যায়ৰ বৈঠকৰ সময়ত ইছলামবাদতো তৎপৰতা আৰম্ভ হৈছে।
এই সকলোবোৰৰ মাজতে পাকিস্তান সেনাৰ আই এছ পি আৰৰ ডি জি লেফটেনেণ্ট জেনেৰেল আহমেদ শ্বৰীফ চৌধুৰীয়েও কিছুদিন পূৰ্বে দাবী কৰিছিল যে যদিহে অপাৰেচন সিন্দুৰৰ দৰে আন এক অভিযান হয় তেন্তে পাকিস্তানে হেনো পূব ভাৰতত আক্ৰমণ কৰিব।
শেহতীয়াকৈ দ্য ইকনমিষ্টৰ সৈতে হোৱা এক সাক্ষাৎকাৰত পাকিস্তান সেনাৰ ডি জি আই এছ পি আৰ লেফটেনেণ্ট জেনেৰেল আহমেদ শ্বৰীফ চৌধুৰীয়ে কয় যে, ‘যদি ভাৰতে অপাৰেচন সিন্দুৰৰ দৰে কোনো সামৰিক ব্যৱস্থা গ্ৰহণ কৰে, তেন্তে পাকিস্তানে ভাৰতৰ গভীৰত আক্ৰমণ কৰিব। আৰু সেই আক্রমণ আৰম্ভ হ’ব পূব ভাৰতৰ পৰা৷ ভাৰতৰ যিকোনো ঠাইতে আমি ষ্ট্ৰাইক কৰিব পাৰো।’
উল্লেখ্য যে ভাৰতে ইতিমধ্যে স্পষ্ট কৰি দিছে যে এতিয়াৰ পৰা ভাৰতত যিকোনো সন্ত্ৰাসবাদী আক্ৰমণক যুদ্ধ হিচাপে গণ্য কৰা হ’ব। সন্ত্ৰাসবাদী আক্ৰমণক ‘ছাঁয়া যুদ্ধ’ বুলি গণ্য কৰা নহ’ব। এই পৰিবেশত সন্ত্ৰাসবাদীক সমৰ্থন কৰা পাকিস্তানী সেনা ভাৰতৰ লক্ষ্য হ’ব।
ভাৰত চৰকাৰৰ এই স্থিতিত ইতিমধ্যে পাকিস্তানত জোকাৰণি আৰম্ভ কৰিছে। কিন্তু ইয়াৰ পিছতো ৰাৱালপিণ্ডিত থকা সেনা বিষয়াসকলে নিজৰ অভিসন্ধি ত্যাগ কৰা নাই। এই পৰিৱেশত তেওঁলোকে পূব ভাৰতক লক্ষ্য কৰি নতুন পৰিকল্পনা ৰচনা কৰিছে।
কিন্তু শেহতীয়াকৈ ভাৰতে স্পষ্ট কৰি দিছে যে পাকিস্তানৰ পাৰমাণৱিক ভাবুকিৰ সন্মুখত ই পিছুৱাই নাযায়। পাকিস্তানৰ পৰা অহা এই পাৰমাণৱিক ভাবুকি যে এক ফোচফোচনি সেয়া ভাৰতে অপাৰেচন সিন্দুৰৰ জৰিয়তে প্ৰমাণ কৰিছে। তাৰমাজতে পাকিস্তানী সেনাই পূব ভাৰতক আক্ৰমণ কৰাৰ ভাবুকি দিছে।
মন কৰিবলগীয়া যে বৰ্তমানৰ বাংলাদেশ চৰকাৰে পাকিস্তানৰ সৈতে ঘনিষ্ঠতা বৃদ্ধি কৰিছে। বাংলাদেশৰ সেনাৰ এটা অংশ পাকিস্তানৰ পক্ষ লৈছে। এই পৰিস্থিতিত এজন পাকিস্তানী সেনা বিষয়াৰ পৰা অহা এনে ভাবুকি যথেষ্ট তাৎপৰ্যপূৰ্ণ।
ইয়াৰ পূৰ্বে পেহেলগাম আক্ৰমণৰ কেইদিনমান পূৰ্বে প্ৰবাসী পাকিস্তানীৰ এখন সন্মিলনত মুনিৰে কাশ্মীৰক ‘পাকিস্তানৰ ডিঙিৰ শিৰ’ আখ্যা দি উত্তেজক মন্তব্য কৰিছিল। এইবাৰো তেওঁ আমেৰিকাত বসবাস কৰা পাকিস্তানীসকলৰ বাবে ‘ব্লেক টাই ইভেণ্ট’ত এনে এক উচটনিমূলক ভাবুকি দিছে।