উপ-ৰাষ্ট্ৰপতিৰ পদত্যাগৰ আঁৰত সঁচাকৈয়ে আছিল নেকি কোনো ৰাজনৈতিক সমীকৰণ? পদত্যাগৰ পিছৰে পৰা নিৰুদ্দেশ প্ৰাক্তন উপ-ৰাষ্ট্ৰপতি জগদীপ ধনখৰ

উপ-ৰষ্ট্ৰপতি পদৰ পৰা হঠাতে পদত্যাগ কৰাৰ পাছত জগদীপ ধনখৰ নিৰুদ্দেশ হৈ থকা বিষয়টোৱে ৰাজনৈতিক মহলত চাঞ্চল্য সৃষ্টি হৈছে। ২১ জুলাইত সংসদৰ বৰ্ষাকালীন অধিৱেশনৰ প্ৰথম দিনাই স্বাস্থ্যজনিত কাৰণ দেখুৱাই পদত্যাগ কৰিছিল ধনখৰে। তেওঁৰ পদত্যাগক লৈ বিৰোধী শিবিৰত গুজব চলি থকাৰ সময়তে পদত্যাগৰ পাছৰ পৰা তেওঁৰ কোনো সঠিক সন্ধান নোপোৱাত শাসক বিজেপিক সমালোচনাৰে থকা সৰকা কৰিছে বিৰোধী শিবিৰে।  

কংগ্ৰেছৰ জ্যেষ্ঠ নেতা তথা প্ৰাক্তন কেন্দ্ৰীয় আইন মন্ত্ৰী কপিল ছিবালে এক ৰাজনৈতিক টিপ্পনী কৰি কয় “মই ‘লাপাটা লেডিজ’ৰ কথা শুনিছো, কিন্তু ‘লাপাটা ভাইচ প্ৰেচিডেণ্ট’ৰ কথা কেতিয়াও শুনা নাই।” তেওঁ ধনখৰ বৰ্তমানে ক’ত আছে, তেওঁ সুৰক্ষিতনে, আৰু তেওঁৰ স্বাস্থ্যৰ অৱস্থা কেনেকুৱা সবিশেষ গৃহমন্ত্ৰী অমিত শ্বাহক জনাবলৈ আহ্বান জনায়।

প্ৰক্তন আইন মন্ত্ৰী গৰাকীয়ে কয় যে পদত্যাগৰ পাছত ধনখৰ চৰকাৰী বাসভৱনো খালী কৰিছিল আৰু প্ৰথম দিনতে তেওঁৰ সৈতে যোগাযোগৰ প্ৰয়াস বিফল হৈছিল। ব্যক্তিগত সচিবে কৈছিল ধনখৰ বিশ্ৰাম লৈ আছে, কিন্তু তাৰ পাছত কোনো তথ্য লাভ কৰা নাই।

ইপিনে, শিৱসেনাৰ উদ্ধৱ ঠাকৰে গোটৰ সাংসদ সঞ্জয় ৰাউটে সোমবাৰে কেন্দ্ৰীয় গৃহমন্ত্ৰী অমিত শ্বাহলৈ পত্ৰ লিখি ধনখৰৰ বৰ্তমান অৱস্থা আৰু অৱস্থান সম্পৰ্কে সবিশেষ জনাবলৈ দাবী জনায়। ৰাউটে পত্ৰখনত কয়, ২১ জুলাইৰ পাছৰ পৰা ধনখৰৰ বিষয়ে কোনো তথ্য নাই আৰু যোগাযোগৰ সকলো প্ৰয়াস ব্যৰ্থ হৈছে।

উল্লেখযোগ্য যে, ৭৪ বছৰীয়া ধনখৰে ২০২২ চনৰ আগষ্টত উপ-ৰাষ্ট্ৰপতিৰ পদ গ্ৰহণ কৰিছিল আৰু ২০২৭ চনলৈ কাৰ্যকাল আছিল। যিহেতু উপ-ৰাষ্ট্ৰপতিয়ে ৰাজ্যসভাৰ অধ্যক্ষ হিচাপেও  কাৰ্যনিৰ্বাহ কৰে তেনে স্থলত বৰ্ষাকালীন অধিৱেশনৰ প্ৰথম দিনাই হঠাতে পদত্যাগ কৰাটো এতিয়াও ৰহস্যাবৃত হৈ আছে।

বিৰোধী শিবিৰৰ মতে, ধনখৰক মোদী চৰকাৰ আৰু বিজেপিয়ে পদত্যাগ কৰিবলৈ বাধ্য কৰিছিল। এতিয়া তেওঁ ক’ত আছে আৰু তেওঁৰ স্বাস্থ্য কেনেকুৱা এই প্ৰশ্নৰ উত্তৰ চৰকাৰে দিব লাগিব বুলি বিৰোধীয়ে সজোৰে দাবী কৰিছে।