এইবাৰ নৱবৰ্ষ উদযাপন নকৰে পাকিস্তানেঃ কিয় জানেনে?

আৰু মাত্ৰ দুদিনৰ পিছতে অন্ত পৰিব ২০২৩ বৰ্ষৰ আৰু নতুন বৰ্ষ ২০২৪ৰ আৰম্ভণি হ’ব। সমগ্ৰ বিশ্ববাসীয়ে পুৰণিক বিদায় দি নতুনক আদৰণি জনাব।

সমগ্ৰ বিশ্বৰ লগতে পাকিস্তানেও আদৰণি জনাব নতুন বৰ্ষক। কিন্তু দেশখনত এইবাৰ নৱবৰ্ষৰ আনন্দ উদযাপন কৰা নহ’ব।

পাকিস্তানৰ তত্ত্বাৱধায়ক প্ৰধানমন্ত্ৰী আনৱাৰুল হক ককৰে এই ঘোষণা কৰি দেশবাসীলৈ নৱবৰ্ষ উদযাপনৰ পৰা বিৰত থাকিবলৈ এই আহ্বান জনাইছে।

পেলেষ্টাইনৰ জনসাধাৰণৰ সৈতে সংহতি প্ৰকাশৰ উদ্দেশ্যে নৱবৰ্ষ উদযাপনত সকলো ধৰণৰ অনুষ্ঠান সম্পূৰ্ণৰূপে নিষিদ্ধ কৰিছে পাকিস্তান চৰকাৰে।

এক ভিডিঅ’ বাৰ্তাত ককৰে কয় যে নিপীড়িত পেলেষ্টাইনীসকলৰ গণহত্যা, বিশেষকৈ নিৰীহ শিশুৰ হত্যাকাণ্ডত পাকিস্তান তথা আৰু মুছলমান ‘উম্মা’(ভাতৃত্ববোধ) গভীৰভাৱে দুখী।

ককৰে কয়, “যোৱা ৭ অক্টোবৰৰ পৰা ইজৰাইলৰ নিষ্ঠুৰ বাহিনীৰ হাতত ২১ হাজাৰতকৈ অধিক নিৰীহ পেলেষ্টাইনী শ্বহীদ হৈছে, য’ত প্ৰায় ৯,০০০ নিৰীহ শিশুও আছে ।”

এনে কাৰণত প্ৰধানমন্ত্ৰী ককৰে পাকিস্তানী জনসাধাৰণক গাজাৰ জনসাধাৰণৰ সৈতে সংহতি প্ৰদৰ্শন কৰি নৱবৰ্ষৰ উদযাপনৰ পৰা বিৰত থাকিবলৈ আহ্বান জনায়।

Special Message of Caretaker Prime Minister Anwaar-ul-Haq Kakar. pic.twitter.com/d5LDESJ2P5

— Prime Minister’s Office (@PakPMO) December 28, 2023

তেওঁ লগতে পাকিস্তান চৰকাৰে পেলেষ্টাইনী জনসাধাৰণৰ সহায়ৰ বাবে দুবাৰ সাহায্য সামগ্ৰী প্ৰেৰণ কৰাৰ বিপৰীতে তৃতীয় সাহায্য অতি সোনকালে প্ৰেৰণ কৰা হ’ব বুলি জানিবলৈ দিয়ে।

একেদৰে পেলেষ্টাইনীসকলক সময়মতে সহায় আগবঢ়োৱা, গাজাৰ পৰা আহতসকলক উদ্ধাৰ কৰা আৰু তেওঁলোকৰ চিকিৎসাৰ বাবে পাকিস্তান চৰকাৰে ইজিপ্ত আৰু জৰ্ডানৰ সৈতে ঘনিষ্ঠ যোগাযোগত আছে বুলিও তেওঁ কয়।