পাকিস্তানৰ নতুন সেনা প্ৰধান লেফটেনেন্ট জেনেৰেল চৈয়দ আসিম মুনীৰ
লেফটেনেণ্ট জেনেৰেল চৈয়দ আসিম মুনীৰ পাকিস্তানৰ নতুন সেনাপ্ৰধান হ’ব। নতুন সেনা প্ৰধানজনৰ নাম আজি ঘোষণা কৰা হৈছে। তথ্য মন্ত্ৰী মাৰিয়াম ঔৰঙ্গজেবে টুইটাৰত এই বাতৰি নিশ্চিত কৰিছে।
বাতৰি অনুসৰি, বৃহস্পতিবাৰে পাকিস্তানৰ প্ৰধানমন্ত্ৰী শ্বাহবাজ শ্বৰীফে তেওঁক সেনা প্ৰধান হিচাপে বাছনি কৰিছে। এই সন্দৰ্ভত নথিপত্ৰ সমূহ ৰাষ্ট্ৰপতি আৰিফ আলভিলৈ প্ৰেৰণ কৰা হৈছে।
তথ্য মন্ত্ৰীজনে লগতে কয় যে লেফটেনেণ্ট জেনেৰেল চাহিৰ চামশাদ মিৰ্জাক জইন্ট চীফ অফ ষ্টাফ কমিটিৰ অধ্যক্ষ হিচাপে বাছনি কৰা হৈছে।
জইন্ট চীফ অফ ষ্টাফ কমিটিয়ে তিনিওটা সশস্ত্ৰ বাহিনীৰ সমন্বয়ক হিচাপে কাম কৰে। জইন্ট চীফ অফ ষ্টাফ কমিটিৰ অধ্যক্ষ হৈছে প্ৰধানমন্ত্ৰী আৰু ৰাষ্ট্ৰীয় কমাণ্ড কৰ্তৃপক্ষৰ মুখ্য সামৰিক উপদেষ্টা।
প্ৰতিৰক্ষা মন্ত্ৰী খাজা আচিফে আশা প্ৰকাশ কৰিছে যে ৰাষ্ট্ৰপতিয়ে প্ৰধানমন্ত্ৰীৰ সিদ্ধান্তৰ সৈতে সহমত পোষণ কৰিব আৰু এই নিযুক্তিকলৈ কোনো বিতৰ্কৰ অৱকাশ নাৰাখিব।