জলবায়ুৰ স্বাৰ্থত নিৰামিষ খাদ্যাভ্যাসক উদগনি দিবলৈ মোদীলৈ পত্ৰ হলিউডৰ পামেলা এণ্ডাৰছনৰ

হলিউডৰ এগৰাকী জনপ্ৰিয় অভিনেত্ৰী পামেলা এণ্ডাৰছনে ভাৰতৰ প্ৰধান মন্ত্ৰী নৰেন্দ্ৰ মোদীলৈ এখন পত্ৰ লিখি নিৰামিষ খাদ্য্যভ্যাসক উদগনি দিবলৈ আহ্বান জনাইছে।

জনপ্ৰিয় অভিনেত্ৰীগৰাকীয়ে People for the Ethical Treatment of Animals(PETA)পেটা নামৰ সংগঠনটোৰ হৈ প্ৰধান মন্ত্ৰী মোদীলৈ এই পত্ৰ প্ৰেৰণ কৰে।

আহ্বানটোত অভিনেত্ৰীগৰাকীয়ে মোদীক ভাৰতত অনুষ্ঠিত সকলো চৰকাৰী  বৈঠক আৰু কাৰ্যসূচীতে নিৰামিষ আহাৰৰ ব্যৱস্থা কৰিবলৈ অনুৰোধ জনায়।

অভিনেত্ৰী পামেলা এণ্ডৰছনে নিৰামিষ খাদ্যাভাসক উদগনি জনাই প্ৰধান মন্ত্ৰী গৰাকীক ভাৰতৰ জলবায়ু পৰিৱৰ্তনৰ সপক্ষে যুঁজখনত নেতৃত্ব দিবলৈ আহ্বান জনায়।

পশুৰ অধিকাৰৰ সপক্ষে মাত মতা স্বেচ্ছাসেৱী সংগঠন পেটা আৰু অভিনেত্ৰীগৰাকীয়ে ইয়াৰ যুক্তি দৰ্শাই কয় যে মানৱ সৃষ্ট গ্ৰীন হাউছ গেছৰ এক পঞ্চমাংশ খাদ্যৰ বাবে পোহা জীৱ-জন্তুৰ দ্বাৰা সৃষ্টি হয়।

“মই সম্পূৰ্ণ বিশ্বাসী যে ভাৰতত উৎপাদিত মাহ জাতীয় শস্যৰ লগতে আন্যান্য খাদ্য সমাগ্ৰীয়ে স্বাস্থ্যৰ বাবে অনিষ্টকাৰী খাদ্য সামগ্ৰীৰ সমূহৰ ঠাই অতি সহজতে ল’ব পাৰিব।” অভিনেত্ৰী গৰাকীয়ে পত্ৰখনত লিখে।

লগতে “পেটা”ৰ নিৰ্দেশকেও প্ৰধান মন্ত্ৰী মোদীক নিউজিলেণ্ড, চীন আৰু জাৰ্মানীৰ দৰে দেশে লোৱা এই নিৰামিষ খাদ্যাভ্যাসক আঁকোৱালি লোৱাৰ বাবে আহ্বান জনায়।

তাৰোপৰি অভিনেত্ৰী গৰাকীয়ে দিল্লীত হোৱা ভয়াৱহ বায়ু প্ৰদূষণত প্ৰভাৱিত সকলো লোকৰ লগতে সমূহ জীৱ-জন্তুলৈও সমবেদনা জনায়। অভিনেত্ৰীগৰাকীয়ে পত্ৰত ভাৰতৰ সুস্বাদু নিৰামিষ খাদ্যৰো প্ৰশংসা কৰে।