পঞ্চায়ত নিৰ্বাচন : গোলাঘাটৰ ভোটকেন্দ্ৰত আৰক্ষীৰ গুলীৰ আঘাতত বাগৰি পৰিল এজন

আজি পুৱা ৭ বজাৰ পৰা চলি থকা পঞ্চায়ত নিৰ্বাচনৰ প্ৰথম পৰ্য্যায়ৰ ভোটগ্ৰহণ প্ৰক্ৰিয়া ৰক্তাক্ত হ’ল গোলাঘাটত। আজি জিলাখনৰ এটা ভোটগ্ৰহণ কেন্দ্ৰত আৰক্ষীৰ গুলীত এজন লোকে আঘাতপ্ৰাপ্ত হোৱাৰ বাতৰি আহিছে।

আৰক্ষীৰ ভাষ্যমতে, জিলাখনৰ হাবিয়াল গাৱঁত থকা হাবিচুক নামৰ ঠাইত জ্ঞানেন্দ্ৰ ৰাজখোৱা নামৰ লোক এজনে চোকা অস্ত্ৰ লৈ ভোট দিবলৈ অহা ভোটাৰক আক্ৰমণ কৰিছিল।

ভোটাৰক আক্ৰমণ কৰাৰ লগতে আৰক্ষীকো লোকজনে আক্ৰমণ কৰিব খুজিছিল বুলি আৰক্ষীৰ সূত্ৰটোৱে দাবী কৰে।

“তেওঁ আৰক্ষীক আক্ৰমণ কৰিবলৈ উদ্যত হোৱাৰ আগতে এখন দা লৈ চাৰিজনকৈ মানুহক আক্ৰমণ কৰিছিল। আমি গুলীয়াবলৈ বাধ্য হ’লো।” আৰক্ষীৰ সূত্ৰটোৱে কয়।

উল্লেখযোগ্য যে লোকজনে অঞ্চলটোত লোকজনে অন্যান্য লোকসকলকো ভাবুকি দি ফুৰিছিল বুলি জানিব পৰা গৈছে। স্থানীয় লোকৰ মতে লোকজন মাতাল অৱস্থাত আছিল।