বৰপেটাত বিজেপিত যোগ দিলে কংগ্ৰেছ-এ আই য়ু ডি এফৰ কেইবাগৰাকী পঞ্চায়ত প্ৰতিনিধিয়ে

ভাৰতীয় জনতা পাৰ্টিৰ সমগ্ৰ দেশত নতুন সদস্য ভৰ্তি অভিযানৰ অংশস্বৰূপে বুধবাৰে বৰপেটা জিলাৰ চেঙাত ২৪ নং চেঙা মুছলমানপাৰা গাঁও পঞ্চায়তৰ উপ-সভানেত্ৰীসহ ছয়গৰাকী কংগ্ৰেছ আৰু এ আই য়ু ডি এফৰ পঞ্চায়ত প্ৰতিনিধিয়ে দলত্যাগ কৰি বিজেপিত যোগদান কৰে।

কংগ্ৰেছৰ এগৰাকী আৰু এ আই ডি য়ু এফৰ পাঁচগৰাকী সদস্যই বিজেপিত যোগদান কৰাৰ লগে লগে চেঙা মুছলমানপাৰা গাঁও পঞ্চায়তখন বিজেপিৰ দখললৈ অহাৰ সম্ভাৱনা প্ৰকট হৈ পৰিছে।

জিলাখনৰ বিজেপি নেতৃত্বই নতুনকৈ বিজেপিলৈ  অহা সদস্যসকলক আনুষ্ঠানিকভাৱে দলৰ মজিয়ালৈ স্বাগতম জনাই আৰু সকলোৱে একেলগে মিলি বৰপেটাত বিজেপিৰ ভেটি মজবুত কৰাৰ বাবে কাম কৰি যাব বুলি উল্লেখ কৰে।

বুধবাৰে মেম্বাৰ, সভাপতি আদিকে ধৰি বিজেপিত যোগদান কৰা পঞ্চায়তৰ প্ৰতিনিধিকেইগৰাকী হ’ল ক্ৰমে হান্নান ভূঞা, আজিনা আহমেদ, ইব্ৰাহিম আলী, ইলিমা খানম, মনোৱাৰা খাতুন আৰু জয়েদা পাৰবিন।

আনহাতে, বিজেপিত যোগদান কৰি পঞ্চায়ত প্ৰতিনিধিকেইগৰাকীয়ে বিজেপি দলৰ নীতি, আদৰ্শৰ প্ৰতি আকৃষ্ট হৈ তেওঁলোকে দলটোৰ মজিয়ালৈ আহিছে বুলি মন্তব্য কৰে।