কাকপথাৰ প্ৰে’ছ ক্লাবৰ অধিৱেশন: সভাপতি, সম্পাদকৰূপে পুনৰ পৰাগ ভূঞা, দীপেন লহকৰ

তিনিচুকীয়া জিলা সাংবাদিক সন্থাৰ অন্তৰ্গত কাকপথাৰ প্ৰে’ছ ক্লাবৰ দ্বি-বাৰ্ষিক অধিৱেশনখনি শুকুৰবাৰে কাকপথাৰ ৰাজহুৱা পুথিভঁৰাল প্ৰেক্ষাগৃহত অনুষ্ঠিত হৈ যায়।

প্ৰতিনিধি সভাই পৰাগ ভূঞাক সভাপতি আৰু দীপেন লহকৰক সম্পাদকৰূপে পুনৰ মনোনীত কৰাৰ লগতে বিজয় দত্তক উপ-সভাপতি, দেৱকান্ত বৰুৱা, ৰাহুল কলিতাক সহকাৰী সম্পাদক, পল্লৱ বৰবৰাক প্ৰাচীৰ পত্ৰিকা সম্পাদক আৰু হেমন্ত সিঙক কোষাধ্যক্ষ হিচাপে লৈ ক্লাবৰ নতুন সমিতি গঠন কৰে।

ক্লাবৰ সদস্যসকলৰ সুবিধা হোৱাকৈ এটি ন্যাস গঠন আৰু সদস্যসকলৰ গ্ৰুপ বীমা কৰাৰ বাবে সভাত প্ৰস্তাৱ গ্ৰহণ কৰা হয়।

সভাৰ উদ্বোধক জিলা সাংবাদিক সন্থাৰ সভাপতি ঋষি দাসে সাংবাদিকসকল অধিক দায়বদ্ধ হোৱাৰ ওপৰত গুৰুত্ব আৰোপ কৰে।

আনহাতে সভাত উপস্থিত থকা অসম বাৰ্তাজীৱী সংঘৰ দক্ষিণ-পূব মণ্ডলৰ উপ সভাপতি কমল তালুকদাৰে সাংবাদিকসকলৰ প্ৰাপ্য অধিকাৰৰ বাবে সংঘই অবিৰতভাৱে প্ৰচেষ্টা চলাই থকা বুলি জানিবলৈ দিয়ে।

সাংবাদিকসকলৰ মাজত পাৰস্পৰিক আন্তৰিকতাপূৰ্ণ সম্পৰ্ক আৰু ইজনে সিজনক সহায় কৰাৰ ওপৰত জোৰ দিয়ে জিলা সাংবাদিক সন্থাৰ সাধাৰণ সম্পাদক ৰাণাজ্যোতি নেওগে।

সভাত কোষাধ্যক্ষ দীনেশ গোয়েল, সহকাৰী সম্পাদক ৰমণী বুঢ়াগোহাঁই, প্ৰাক্তন জিলা উপ সভাপতি শান্তনু গোস্বামী, জিলা কাৰ্য্যনিৰ্বাহক সদস্য মানস প্ৰতিম গগৈ, মনোজ বৰুৱা, হেমন্ত শইকীয়া, প্ৰশান্ত চেতিয়া আদিও উপস্থিত আছিল।