জন্মাষ্টমীত পেৰা খাই বিভ্ৰম বালকৃষ্ণ, এইমছত ভৰ্তি

পতঞ্জলি যোগপীঠৰ ভগৱান শ্ৰীকৃষ্ণ জন্মাষ্টমীত “পেৰা খোৱাৰ পিছতে” বিভ্ৰম হৈ পৰিছে চি ই অ’ আচাৰ্য্য বালকৃষ্ণ।

আচাৰ্য্যজনক ঋষিকেশৰ এইমছত ভৰ্তি কৰোৱা হৈছে।

হৰিদ্বাৰতে পতঞ্জলি যোগপীঠৰ চিকিৎসা বিশ্ববিদ্যালয় আছে যদিও আচাৰ্য্যগৰাকীৰ অৱস্থা গুৰুতৰ হৈ পৰাত তেখেতক ঋষিকেশ এইমছত ভৰ্তি কৰা হয়।

শুকুৰবাৰে বিয়লি প্ৰায় ৪.১৫ বজাত বালকৃষ্ণক এইমছৰ আই চি ইউত ভৰ্তি কৰা হৈছে।

বালকৃষ্ণ সতীৰ্থ যোগগুৰু স্বামী ৰামদেৱে জন্মাষ্টমীৰ পেৰা খোৱাৰ পিছতে বালকৃষ্ণই অসুস্থতাত ভোগাটো নিশ্চিত কৰিছে।

ঋষিকেশ এইমছৰ অধীক্ষক ব্ৰহ্মপ্ৰকাশৰ উদ্ধৃতিৰে প্ৰকাশিত বাতৰি মতে, বালকৃষ্ণক “altered consciousness” (পৰিৱৰ্তিত চেতনা) অৱস্থাত আই চি ইউত ভৰ্তি কৰা হৈছিল।

বালকৃষ্ণই নিজৰ চৌপাশ আৰু লোকসকলক চিনিব পৰা নাই।

তেওঁক বৰ্তমান নিউৰ’ফিজিচিয়ান আৰু কাৰ্ডিঅ’লজিষ্টৰ দল এটাই চিকিৎসা চলাই আছে।

সতীৰ্থ স্বামী ৰামদেৱ আৰু চিকিৎসালয় কৰ্তৃপক্ষৰ বিবৃতি মতে, বৰ্তমান তেওঁৰ অৱস্থা সুস্থিৰ।