আজি পতঞ্জলিয়ে মুকলি কৰিব ক’ভিড-১৯ৰ আয়ুৰ্বেদিক ঔষধ
বিশ্বৰ প্ৰায়বোৰ দেশে ক’ৰ’না ভাইৰাছৰ ভেকশ্যিন অথবা ঔষধ নিৰ্মাণৰ বাবে চেষ্টা অব্যাহত ৰখাৰ সময়তে যোগ গুৰু বাবা ৰামদেৱে আজি মুকলি কৰিবলৈ ওলাইছে ক’ভিড-১৯ৰ ঔষধ।
ভাৰতৰ বাবে আশাৰ বতৰা কঢ়িয়াই অনা ৰামদেৱে আজি উত্তৰাখণ্ডৰ হৰিদ্বাৰস্থিত পতঞ্জলি যোগপীঠত আয়োজিত এক কাৰ্যসূচীৰ জৰিয়তে এই ঔষধবিধ মুকলি কৰিব।
মুকলি কৰিব লগীয়া আয়ুৰ্বেদিক ঔষধবিধৰ নাম দিছে ‘কৰ’নিল’।
উল্লেখ্য যে চলিত মাহৰ আৰম্ভণিতে পতঞ্জলিৰ চি ই অ’ আচাৰ্য্য বালকৃষ্ণই কৈছিল যে কোম্পানিয়ে ক’ভিড-১৯ৰ ঔষধ বিচাৰি পাইছে।
পতঞ্জলিৰ মতে হৰিদ্বাৰস্থিত পতঞ্জলি ৰিচাৰ্ছ ইনষ্টিটিউট আৰু নেশ্যনেল ইনষ্টিটিউট অফ মেডিকেল ছায়েন্সৰ যুটীয়া প্ৰচেষ্টাত এই আয়ুৰ্বেদিক ঔষধবিধ তৈয়াৰ হৈছে।
অশ্বগন্ধা, গিলয় আৰু তুলসীৰে তৈয়াৰী ঔষধ কৰ’নিলৰ সেৱনে ক’ভিড-১৯ৰ পৰা এশ শতাংশই মুক্তি লাভ কৰিব পাৰিব বুলি বাবা ৰামদেৱে দাবী কৰিছে।
পতঞ্জলিৰ চি ই অ’ বালকৃষ্ণই কৈছে যে এই আয়ুৰ্বেদিক ঔষধবিধে ক’ভিড-১৯ত আক্ৰান্ত এজন ৰোগীক ৫ৰ পৰা ১৪ দিনৰ ভিতৰত সুস্থ কৰি তুলিব।