মুক্তিৰ পূৰ্বেই দুষ্টচক্ৰই অনলাইনত ভাইৰেল কৰিলে ‘পাঠান’
মনোৰঞ্জনৰ জগতখনত ২০২৩ বৰ্ষৰ আৰম্ভণি হৈছিল ‘পাঠান’নামৰ চিনেমাখনেৰে। নতুন ছবিৰ বাবে চাৰি বছৰ ধৰি অপেক্ষা কৰি আছিল শ্বাহৰুখ খানৰ অনুৰাগীয়ে। অৱশেষত দিনটো আহি পালেহি। আজি মুকলি কৰি দিয়া হৈছে পাঠান। পুৱা ৬ বজাৰ পৰা চিনেমা হলৰ বাহিৰত ভিৰ। দেশৰ প্ৰায় সকলো ডাঙৰ চহৰৰ পৰিৱেশ একেধৰণৰ।
ছবিখনক লৈ কোটি কোটি টকাৰ উপাৰ্জনৰ সপোনত এতিয়া চেঁচাপানী ঢালিলে দুষ্ট চক্ৰই। মুক্তিৰ পূৰ্বেই অনলাইনত ভাইৰেল কৰিলে বহু বিতৰ্কিত ছবিখন।
সূত্ৰ অনুসৰি এই ছবিখন মুক্তিৰ চাৰি ঘণ্টা পূৰ্বে ‘ফিল্মী জিলা’, ‘অনলাইন মুভি ৱাচ’, ‘তামিল ৰকাৰছ’ আদি অনলাইন চাইটত প্ৰচাৰ কৰা হৈছে। মুক্তিৰ পিছত ছবিখনৰ ‘চিনেমা হল প্ৰিন্ট’ও উপলব্ধি হ’ল ‘টৰেণ্ট’ত ।
শ্বাহৰুখ খানকে ধৰি চিনেমাখনৰ পৰিচালকে বাৰে বাৰে এনে কাম নকৰিবলৈ আহ্বান জনোৱাৰ পিছতো কোন দুষ্টচক্ৰই এই কাম কৰিলে সেয়া এতিয়ালৈকে জানিব পৰা হোৱা নাই । কিন্তু এইদৰে অনলাইনত উপলব্ধ হোৱাৰ ঘটনাই যে চিনেমাখনৰ বাণিজ্যিক দিশত প্ৰভাৱ পেলাব সি ধূৰূপ।