মাওবাদী আক্ৰমণত নিহত জোৱানৰ খবৰ নল’লে চৰকাৰে; ভোট বৰ্জনৰ সিদ্ধান্ত গৌৰীসাগৰবাসীৰ

ছট্টিশগড়ৰ কংককেৰ জিলাত যোৱা ৪ এপ্ৰিলত মাওবাদীৰ সৈতে হোৱা সংঘৰ্ষত চহিদ হোৱা সীমান্ত সুৰক্ষা বাহিনীৰ ১১৪ নং বেটেলিয়নৰ সহকাৰী উপ পৰিদৰ্শক শিৱসাগৰ জিলাৰ দিখৌমুখ ধনেখোৱা গাঁৱৰ বিপুল বড়াৰ আজি নিজ বাসগৃহত এক শোকাকুল পৰিৱেশত ৰাজহুৱা আদ্যশ্ৰাদ্ধ অনুষ্ঠিত হয়।

আদ্যশ্ৰাদ্ধত উপস্থিত অগনন লোকে বীৰ জোৱান গৰাকীলৈ অশ্ৰুসিক্ত নয়নেৰে শ্ৰদ্ধাঞ্জলি ক্ষাপন কৰে।

উল্লেখযোগ্য যে যোৱা ৪ এপ্ৰিলত ছট্টিশগড়ত মাওবাদীৰ সৈতে হোৱা উক্ত গুলীয়াগুলীত অসমৰ বিপুল বড়াকে ধৰি সীমান্ত সুৰক্ষা বাহিনীৰ ৪ গৰাকী জোৱানে প্ৰাণ হেৰুৱাৰ লগতে ২ জন জোৱান গুৰুতৰভাৱে আহত হৈছিল।

আজি আদ্যশ্ৰাদ্ধ স্থলীত উপস্থিত থকা ৰাইজে চহিদ বড়াৰ অমূল্য ত্যাগক অসম চৰকাৰ তথা কেন্দ্ৰীয় চৰকাৰে যাথাচিত গুৰুত্ব নিয়াৰ বাবে উভয় চৰকাৰক তীব্ৰ ভাষাৰে গৰিহনা দিয়াৰ লগতে ইয়াৰ প্ৰতিবাদত আগন্তুক লোকসভা নিৰ্বাচনত সৰ্বসন্মতভাৱে ভোটদানৰ বিৰত থকাৰ প্ৰস্তাৱ গ্ৰহণ কৰে।