পথ দুর্ঘটনাত নিহত ডাঃ সুমিত গাৰোডিয়া আৰু তেওঁৰ পত্নীলৈ শেষ শ্ৰদ্ধাঞ্জলি শিৱসাগৰবাসীৰ

শুকুৰবাৰে বুঢাপাহাৰৰ সমীপত এক পথ দুৰ্ঘটনাত নিহত হোৱা শিৱসাগৰ অসামৰিক চিকিৎসালয়ৰ সুদক্ষ চিকিৎসক ডাঃ সুমিত গাৰোডিয়া আৰু তেওঁৰ পত্নী নন্দিনী গাৰোডিয়াৰ নশ্বৰ দেহ আজি পুৱা ৬ বজাত শিৱসাগৰলৈ অনা হয়। শিৱসাগৰ থানা ৰোডত থকা আৰ্শীবাদ ভৱনত অসংখ্য গুণমুগ্ধৰ লগতে বিভিন্ন দল সংগঠন তথা ব্যক্তি বিশেষে গাৰোডিয়া দম্পতিলৈ শেষ শ্ৰদ্ধাঞ্জলি জ্ঞাপন কৰে।

গাৰেডিয়া দম্পতিৰ নশ্বৰ দেহ আহি পোৱাৰ লগে লগেই শোকত ভাগি পৰে উপস্থিত কেইবা শতাধিক লোক। অতি নম্ৰ আৰু সুদক্ষ চিকিৎসকজনক অকালতে হেৰুৱাই শোকত মৰ্মাহত হৈ পৰিছে সমগ্ৰ শিৱসাগৰবাসী।

শ্ৰদ্ধাঞ্জলি অনুষ্ঠানত শিৱসাগৰ জিলা কৰ্মচাৰী সন্থা,  চিভিল হাস্পাতলৰ কৰ্মচাৰী সন্থা, ডাক্তৰ এছ’চিয়েশ্যন,হামৰাহী, পূৰ্বোত্তৰ মাৰোৱাৰী সন্মিলন,মাহোৱাৰী পঞ্চায়ত, লায়নছ ক্লাৱ, ৰ’টাৰী ক্লাৱ, মহেশ্বৰী সভা, আগৰৱালা সভা, নাজিৰা গৌশালা,অসম চেম্বাৰ্চ অৱ কমাৰ্চ শিৱসাগৰ জিলা সমিতি, মাৰোৱাৰী যুৱ মঞ্চ, মাৰোৱাৰী যুৱ মঞ্চ, প্ৰগতি শাখা, মাৰোৱাৰী মহিলা সন্মিলনকে ধৰি বহু দল সংগঠনে শেষ শ্ৰদ্ধাঞ্জলি জ্ঞাপন কৰে।

ইয়াৰ পাছতেই ডাঃ সুমিত গাৰোডিয়া আৰ তেওঁৰ পত্নীৰ নশ্বৰ দেহ ডিব্ৰুগড়ৰ ঘৰলৈ লৈ যোৱা হয়। ডিব্ৰুগড়ত আজি দুয়োৰে শেষকৃত্য সম্পন্ন কৰা হব।

উল্লেখ্য যে,  হোজাইৰ আত্মীয়ৰ ঘৰত এক বিবাহ অনুষ্ঠানত অংশ লবলৈ গৈ থকা অৱস্থাত  শুকুৰবাৰে বুঢ়াপাহাৰৰ সমীপত এখন ট্ৰেভেলাৰৰ সৈতে মুখামুখি সংঘৰ্ষত থিতাতে নিহত হৈছিল ডাঃ সুমিত গাৰোডিয়া আৰু তেওঁৰ পত্নী নন্দিনী গাৰোডিয়া।

আনহাতে, দুৰ্ঘটনাটোত গুৰুতৰভাৱে আহত দুই পুত্ৰক সংকটজনক অৱস্থাত গুৱাহাটীলৈ লৈ যোৱা হয়। বৰ্তমান দুয়োজন বিপদমুক্ত বুলি জানিব পৰা গৈছে।