ধনতেৰাচ উপলক্ষে শিৱসাগৰৰ বিপনীত গ্ৰাহকৰ ভিৰ
সোমবাৰে ধনতেৰাচ উপলক্ষে শিৱসাগৰৰ বিভিন্ন বিপনীত ব্যাপক ভিৰ পৰিলক্ষিত হোৱা দেখা যায়। দেশৰ বিভিন্ন স্থানৰ লগতে শিৱসাগৰতো পবিত্ৰ ধনতেৰাচ পালন কৰা হয়।
দেৱালীৰ এদিন আগতে সমগ্ৰ দেশতে মহা ধুমধামেৰে ধনতেৰাচ পালন কৰা হয়। হিন্দু শাস্ত্ৰত উল্লেখ থকা মতে, সমুদ্ৰ মন্থন কৰোতে ধনতেৰাচৰ দিনা অর্থাৎ দেৱালীৰ এদিনৰ পূৰ্বে ধন দেৱতা কুবেৰ আৰু মা লক্ষ্মীয়েও দেখা দিছিল। সেয়ে এই দিনটোতে বাচন বৰ্তন, সোণ ৰূপৰ সামগ্ৰী ক্ৰয় কৰিলে শুভ লাভ হয় বুলি বিশ্বাস আছে।
বিশ্বাস কৰা হয় যে ধনতেৰাচৰ দিনাই ধনৰ দেৱতা কুবেৰ আৰু মা লক্ষ্মীৰ পূজা কৰা হয় যাতে বছৰটোত ধন ,জন, ঐশ্বৰ্য্য ,বিভূতি উভৈনদী হৈ ৰয়। কোনো দিন যেন, ধনৰ অপচয় নহয় আৰু ধনে ধানে বছৰটো কুশলে যায়।
শিৱসাগৰত পবিত্ৰ ধনতেৰাচৰ বিভিন্ন ব্যৱসায় প্ৰতিষ্ঠান সমূহত ভক্তৰ বৃহৎ ভিৰ পৰিলক্ষিত হোৱা দেখা গৈছে। বিভিন্ন জনে আহি অতি ভক্তিভাৱে নিজৰ গৃহলৈ বুলি এপদকৈ মূল্যৱান সামগ্ৰী ক্ৰয় কৰা দেখা গৈছে।
ধনতেৰাচত বিশেষকৈ সোণ,ৰূপ, ষ্টিলৰ বাচন বৰ্তন ক্ৰয় কৰা হয় আৰু সেই সামগ্ৰী সমূহ দেৱালীৰ দিনা পূজাত ব্যৱহাৰ কৰা হয়। যদিও অসমত এই বিশেষ দিনটো পূৰ্বতে ইমান বহুলভাৱে পালন কৰা হোৱা নাছিল কিন্তু ,বর্তমান সময়ত ধনতেৰাচ যথেষ্ট সংখ্যক লোকে অতি ভক্তিভাৱেৰে পালন কৰা দেখা যায়।