অনলাইন পদ্ধতিৰে অনুষ্ঠিত হ’ব গুৱাহাটী বিশ্ববিদ্যালয়ৰ অধীনৰ স্নাতকোত্তৰ পৰীক্ষা

অনলাইন মাধ্যমৰে অনুষ্ঠিত হ’ব গুৱাহাটী বিশ্ব বিদ্যালয়ৰ অধীনৰ স্নাতকোত্তৰ চূড়ান্ত বৰ্ষৰ পৰীক্ষা সমূহ।

এক জাননীযোগে এই কথা জনাইছে বিশ্ববিদ্যালয়খনৰ পঞ্জীয়কে।

ক’ভিড মহামাৰীৰ ভয়াবহ পৰিস্থিতিৰ প্ৰতি লক্ষ্য ৰাখি এই সিদ্ধান্ত লোৱা হৈছে।

এই কথা নৰ্থ-ইষ্ট নাওক জনাইছে গুৱাহাটী বিশ্ববিদ্যালয়ৰ ছাত্ৰ একতা সভাৰ সাধাৰণ সম্পাদক মুন তালুকদাৰে।

অৱশ্যে, স্নাতক মহলাৰ পৰীক্ষাসমূহ অনলাইন, অফলাইন দুয়োটা মাধ্যমতে অনুষ্ঠিত হ’ব বুলি নিৰ্দেশনাত উল্লেখ আছে।

তদুপৰি এই নিৰ্দেশনাৰ SOP পৰীক্ষা নিয়ন্ত্ৰকে অচিৰেই প্ৰকাশ কৰিব বুলি জানিব পৰা গৈছে।

উল্লেখযোগ্য যে, ক’ভিডৰ ভয়াৱহতাৰ প্ৰতি লক্ষ্য ৰাখি এই অনলাইন মাধ্যমৰে পৰীক্ষা অনুষ্ঠিত কৰিবলৈ দাবী উত্থাপন কৰি আহিছিল গুৱাহাটী বিশ্ব বিদ্যালয় ছাত্ৰ একতা সভাই।

উল্লেখযোগ্য যে, মঙলবাৰে, সদৌ অসম ছাত্ৰ সন্থাৰ সভাপতি দীপাংক নাথৰ নেতৃত্বত এটা দলে গুৱাহাটী বিশ্ববিদ্যালয়ৰ উপাচাৰ্যক সাক্ষাৎ কৰি স্নাতক আৰু স্নাতকোত্তৰ পৰীক্ষাৰ বিষয়ে আলোচনা কৰি আছুৰ তৰফৰ পৰা অনলাইন আৰু অফলাইন উভয় পদ্ধতিৰে Open Book Examination অনুষ্ঠিত কৰাৰ আহ্বান জনাইছিল যাৰ জৰিয়তে একেখন প্ৰশ্নকাকতকে লৈ ছাত্ৰ-ছাত্ৰীসকলে নিজ নিজ ইচ্ছা অনুযায়ী পৰীক্ষাগৃহলৈ আহি বা নহাকৈয়ো ঘৰতে থাকি পৰীক্ষাত বহিব পাৰিব।

ইয়াৰ পাছতে ততাতয়াকৈ এই সিদ্ধান্ত গ্ৰহণ কৰে গুৱাহাটী বিশ্ববিদ্যালয় কৰ্তৃপক্ষই।