অৰুণাচল প্ৰদেশৰ পৰা ৫জন ভাৰতীয়ক অপহৰণ কৰিছে চীনৰ পিএলএ’ই ; দাবী বিধায়কৰ
অৰুণাচল প্ৰদেশৰ কংগ্ৰেছ বিধায়ক নিনং এৰিঙে দাবী কৰিছে যে চীনৰ পিপুলছ লিবাৰেশ্যন আৰ্মিয়ে (পিএলএ) পাঁচজন ভাৰতীয় লোকক অপহৰণ কৰিছে।
পূব লাডাখত ভাৰত-চীনৰ মাজত সীমান্তকলৈ চলি থকাৰ মাজতে এই দাবী উত্থাপন হৈছে।
কংগ্ৰেছ বিধায়কগৰাকীয়ে এটা টুইটত লিখিছে,’’ শ্বকিং নিউজ: আমাৰ ৰাজ্য অৰুণাচল প্ৰদেশৰ উজনি সোৱণশিৰি জিলাৰ পৰা পাঁচজন লোকক বাতৰি অনুসৰি, চীনৰ পিপুলছ লিবাৰেশ্যন আৰ্মিয়ে (পিএলএ) ‘অপহৰণ’ কৰিছে।‘’
‘’কেইমাহমান পূৰ্বেও একেধৰণৰ ঘটনা ঘটিছিল। পিএলএ আৰু চিচিপি চীন’ক যোগ্য প্ৰত্যুত্তৰ দিবই লাগিব,’’-তেওঁ টুইটত কয়।
অপহৃত হোৱা পাঁচজন লোকক টনু বাকাৰ, প্ৰছাট ৰিঙলিং, নাগাৰু ডিৰি, ডংগটু এবিয়া আৰু টচ ছিংকাম বুলি চিনাক্ত কৰা হৈছে।
জানিব পৰা মতে, তেওঁলোকক অৰুণাচল প্ৰদেশৰ ভাৰত-চীন সীমান্তৰ উজনি সোৱণশিৰি জিলাৰ অন্তৰ্গত ছেৰা ৭ এলেকাৰ পৰা অপহৰণ কৰা হৈছে।
‘’চীনাসকলে পুনৰ অৰাজকতা আৰম্ভ কৰিছে। লাডাখ আৰু ডোকলামৰ দৰেই তেওঁলোকে (চীনৰ সেনা) অৰুণাচল প্ৰদেশতো আগ্ৰাসন আৰম্ব কৰিছে,’’-এৰিঙে সংবাদ মাধ্যমৰ আগত কয়।
‘’এইটোৱে তেওঁলোক আমাৰ সীমান্তৰ নিয়ন্ত্ৰণ ৰেখাৰ ভিতৰত প্ৰৱেশ কৰাটোকে প্ৰমান কৰে’’ বুলি দাবী কৰি তেওঁ কয় যে চীনৰ সেনাই ভাৰতৰ নাগৰিকক অপহৰণ কৰি নিয়াৰ এইটো দ্বিতীয়টো ঘটনা।
উল্লেখযোগ্য যে কংগ্ৰেছ বিধায়কগৰাকীয়ে শনিবাৰে প্ৰধান মন্ত্ৰী নৰেন্দ্ৰ মোদী আৰু মুখ্য মন্ত্ৰী পেমা খাণ্ডুক টুইট কৰি অৰুণাচল প্ৰদেশত চীনৰ আগ্ৰাসনৰ বিষয়ে সতৰ্ক কৰিদি বিষয়টো অৱগত কৰে।
এৰিঙে লগতে চীনৰ সেনাই অপহৰণ কৰা পাঁচজন লোকৰ ভিতৰত নিজৰ ভাতৃয়ো থকা বুলি দাবী কৰা প্ৰকাশ ৰিঙলিং নামৰ ব্যক্তিজনৰ এটা পেচবুক প’ষ্টৰ স্ক্ৰীণ শ্বটো সংলগ্ন কৰিছে।