কোনে পাব লাগে ‘পদ্ম সন্মান’? দেশবাসীকেই বাছনি কৰাৰ দায়িত্ব দিলে প্ৰধানমন্ত্ৰী মোদীয়ে
প্ৰধানমন্ত্ৰী নৰেন্দ্ৰ মোদীয়ে দেশবাসীৰ ওচৰত পদ্ম সন্মানৰ বাবে প্ৰাৰ্থী মনোনয়নৰ আবেদন জনাইছে। ইতিহাসত প্ৰথমবাৰৰ বাবে এইদৰে দেশবাসীক মনোনয়নৰ দায়িত্ব অৰ্পণ কৰা হৈছে।
দেওবাৰে প্ৰধানমন্ত্ৰী মোদীয়ে এটা টুইটাৰ যোগে এই আহ্বান জনাইছে।
প্ৰধানমন্ত্ৰীয়ে টুইটাৰত লিখিছে,’’ভাৰতত এনে বহু প্ৰতিভাবান মানুহ আছে যিসকলে তৃণমূল পৰ্যায়ত অসাধাৰণ কাম কৰি আছে। প্ৰায়েই আমি তেওঁলোকৰ বহুতকে দেখিবলৈ বা তেওঁলোকৰ কথা শুনিবলৈ নাপাওঁ। আপুনি এনেকুৱা কাৰোবাক চিনি পায়? তেনেহ’লে আপুনি তেওঁক পদ্ম সন্মানৰ বাবে মনোনীত কৰিব পাৰে। অহা ১৫ ছেপ্টেম্বৰলৈকে মনোনয়ন জমা দিব পাৰিব।‘’
ইয়াৰ বাবে কেন্দ্ৰীয় চৰকাৰে এটা নতুন ৱেবছাইট খুলিছে। padmaawards.gov.in নামৰ এই ৱেবছাইটত গৈ দেশৰ সাধাৰণ নাগৰিকে বাছনি কৰিব পাৰে তেওঁলোকৰ পছন্দৰ ‘পীপলছ পদ্ম’ক।
India has many talented people, who are doing exceptional work at the grassroots. Often, we don’t see or hear much of them. Do you know such inspiring people? You can nominate them for the #PeoplesPadma. Nominations are open till 15th September. https://t.co/BpZG3xRsrZ
— Narendra Modi (@narendramodi) July 11, 2021
উল্লেখ্য যে ১৯৫৪চনত দেশৰ সৰ্বোচ্চ অসামৰিক সন্মান ‘ভাৰতৰত্ন’ৰ লগতে ‘পদ্ম সন্মান’ আৰম্ভ কৰা হৈছিল। পদ্ম সন্মানৰ ভিতৰত আছে পদ্মবিভূষণ, পদ্মভূষণ আৰু পদ্মশ্ৰী এই তিনিটা সন্মান।
ৰাষ্ট্ৰপতিয়ে প্ৰতিবছৰে গণতন্ত্ৰ দিৱসত এই সন্মান প্ৰাপকসকলক পদক আৰু মানপত্ৰ প্ৰদান কৰে।
দেশৰ অচিনাক্ত তথা লুকাই থকা প্ৰতিভাক স্বীকৃতি দিয়াৰ লক্ষ্য আগত ৰাখি এইবাৰ প্ৰধানমন্ত্ৰীয়ে তেনে ব্যক্তিক বিচাৰি উলিওৱাৰ দায়িত্ব দিছে দেশৰ জনসাধাৰণক।