ৰূপহীহাটত ড্ৰাগছৰ বিৰুদ্ধে আৰক্ষীৰ অভিযান; ড্ৰাগছ সহ গ্ৰেপ্তাৰ এজন সৰবৰাহকাৰী

ৰূপহীহাটৰ পিছত সোমাবাৰে নিশা নগাঁও জিলাৰ চামগুৰিত আৰক্ষীয়ে ড্ৰাগছৰ বিৰুদ্ধে ব্যাপক অভিযান চলায়।

এই অভিযানত চামগুৰিৰ সাপ্তাহিক বজাৰৰ এখন দোকানৰ পৰা আৰক্ষীৰ দলটোৱে যথেষ্ট সংখ্যক ড্ৰাগছযুক্ত টেবলেট, ভাং আৰু লিক’ৰ বটল জব্দ কৰিবলৈ সক্ষম হয়।

আৰক্ষীয়ে নিষিদ্ধ সামগ্ৰী সমূহৰ লগতে দোকান খনৰ পৰা মাইনুল হুছেইন নামৰ এজন ড্ৰাগছ সৰবৰাহকাৰীক গ্ৰেপ্তাৰ কৰে।

কলিয়াবৰ মহকুমা আৰক্ষী বিষয়া মৃন্ময় দাসৰ নেতৃত্বত কলিয়াবৰ থানাৰ ভাৰপ্ৰপ্ত আৰক্ষী বিষয়া গৰাকীৰ সহযোগত এটা বিশেষ অভিযানকাৰী দলে চামগুৰিত নিশা এই সফল অভিযানটো চলাইছিল।

উল্লেখযোগ্য যে,  দেওবাৰে নিশা আৰক্ষীৰ একেটা অভিযানকাৰী দলে নগাঁৱৰ ৰূপহীহাটত অভিযান চলাই পাঁচজনকৈ ড্ৰাগছ সৰবৰাহকাৰীক কৰায়ত্ব কৰাৰ লগতে কিছু সংখ্যক ড্ৰাগছ ভৰ্তি চিচি আৰু নগদ টকা জব্দ কৰিবলৈ সক্ষম হৈছিল।

অৱশ্যে সম্প্ৰতি ৰূপহীহাট আৰু চামগুৰিৰ বিভিন্ন ঠাইত সক্ৰিয় হৈ পৰা  ড্ৰাগছৰ এই বৃহৎ চক্ৰটো আৰক্ষীয়ে শীঘ্ৰে উৎখাত কৰিবলৈ অনাগত সময়ত অঞ্চল দুটাত নিতৌ অভিযান অব্যাহত ৰাখিব বুলি জানিবলৈ দিয়ে।

আনহাতে, ড্ৰাগছৰ বিৰুদ্ধে আৰক্ষীৰ এই অভিযানক আদৰণি জনাইছে অঞ্চলটোৰ স্থানীয় ৰাইজে।