এইবাৰ পূব গোৱালপাৰাত অগপ-কংগ্ৰেছৰ মাজত হ’ব মূল নিৰ্বাচনী যুঁজ

দ্বিতীয় পৰ্যায়ত অনুষ্ঠিত হ’ব লগা পঞ্চায়ত নিৰ্বাচনৰ বাবে গোৱালপাৰা জিলাৰ বিভিন্ন গাঁও পঞ্চায়তত ৰাজনৈতিক দলৰ লগতে একাংশ নিৰ্দ্দলীয় প্ৰাৰ্থীয়ে নিৰ্বাচনী প্ৰচাৰ আৰম্ভ কৰিছে। শেহতীয়াকৈ জিলাখনৰ গোৱালপাৰা পূব বিধানসভা সমষ্টিৰ অন্তৰ্গত ৬০ নং মানিকপুৰ-ভেলাখামাৰ গাঁও পঞ্চায়তত নিৰ্বাচনী প্ৰচাৰ তীব্ৰতৰ হোৱা পৰিলক্ষিত হৈছে ৷

গাঁও পঞ্চায়তখনত কংগ্ৰেছ আৰু অগপৰ মাজত মুল নিৰ্বাচনী যুঁজখন চলিব বুলি অনুমান কৰা হৈছে যদিও শেহতীয়াকৈ কংগ্ৰেছত সৃষ্টি হোৱা টিকট কেন্দ্ৰীক সংঘাতে অগপক লাভাম্বিত কৰিব বুলি একাংশই মন্তব্য কৰে।

সংখ্যালঘু অধ্যুষিত অঞ্চলটোত নিৰ্বাচনৰ প্ৰাকমুহূৰ্তত কেইবা শতাধিক লোকে দলে-বলে অগপত যোগদান কৰা ঘটনাই দলটোক অধিক শক্তিশালী কৰি তুলিছে।

উল্লেখযোগ্য যে অগপই বদাহপুৰ জিলা পৰিষদৰ সদস্য বাবে মুজাৰুল ইছলামক থিয় কৰোৱাৰ বিপৰীতে মানিকপুৰ-ভেলাখামাৰ পঞ্চায়ত সভানেত্ৰী পদৰ বাবে আঞ্জুৱাৰা বেগম আৰু আঞ্চলিক পঞ্চায়ত সদস্যা পদৰ বাবে তুহিন ৰহমানক থিয় কৰাইছে। আনহাতে কংগ্ৰেছৰ হৈ সভানেত্ৰী পদত নাজিয়া হুছেইন আৰু নিৰ্দ্দলীয় প্ৰাৰ্থী হিচাপে জায়েদা খাতুন আৰু আছমা বেগমে মনোনয়ন দাখিল কৰিছে।

যোৱা বুধবাৰে জিলাখনৰ ভেলাখামাৰ আৰু সকোমাৰী গাঁৱত দুখনকৈ নিৰ্বাচনী সভা অনুষ্ঠিত হয়। ইয়াৰ সমান্তৰালভাৱে মৰণৈ গাঁও পঞ্চায়তটো দলটোয়ে জোৰদাৰ নিৰ্বাচনী প্ৰচাৰ আৰম্ভ কৰিছে।