লোকসভা নিৰ্বাচনৰ দিন ঘোষণাক আদৰণি অসমৰ বিভিন্ন ৰাজনৈতিক দলৰ

ভাৰতৰ নিৰ্বাচন আয়োগে দেওবাৰে বিয়লি ৫ বজাত এক সংবামেলযোগে আগন্তুক লোকসভা নিৰ্বাচনৰ দিন আনুষ্ঠানিকভাৱে ঘোষণা কৰা কাৰ্যক আদৰণি জনাইছে অসমৰ বিভিন্ন ৰাজনৈতিক দলসমূহে।

উল্লেখ্য যে অসমত অহা  ১১, ১৮ আৰু ২৩ এপ্ৰিলত তিনিটা পৰ্যায়ত নিৰ্বাচন অনুষ্ঠিত হ’ব। প্ৰথম পৰ্যায়ত ৰাজ্যৰ ৫টা সমষ্টিৰ নিৰ্বাচন অনুষ্ঠিত হ’ব। সেইদৰে দ্বিতীয় পৰ্যায়ত ৫টা আৰু তৃতীয় পৰ্যায়ত বাকী ৪টা সমষ্টিৰ নিৰ্বাচন অনুষ্ঠিত হ’ব।

‘অসমত হ’ব লগীয়া ভোটগ্ৰহণৰ দিন সমূহক লৈ আমি সুখী। আমি নিৰ্বাচনৰ বাবে সাজু’। এইদৰে কয় জ্যেষ্ঠ কংগ্ৰেছী নেতা দেৱব্ৰত শইকীয়াই।

ইফালে বিজেপিও নিৰ্বাচনী আয়োগৰ সিদ্ধান্তক আদৰণি জনোৱা পৰিলক্ষিত হয়। ‘বিজেপিয়ে অসমৰ অধিকাংশ আসনেই দখল কৰিব। বৰ্তমান সময়ত দেশত প্ৰধান মন্ত্ৰী নৰেন্দ্ৰ মোদীৰ বিকল্প নাই। বিগত পাঁচ বছৰত কৰা উন্নয়নমূলক কাম-কাজৰ বাবে আমি জনসাধাৰণৰ হৃদয় জয় কৰিছো। সেয়ে মই বিশ্বাসী যে সমগ্ৰ দেশতে বিজেপিয়ে ভাল ফলাফল দেখুৱাব পাৰিব। এইদৰে কয় বিজেপিৰ জ্যেষ্ঠ নেতা তথা অসম পেট্ৰ’কেমিকেলছ লিমিটেডৰ অধ্যক্ষ জগদীশ ভূঞাই।

উল্লেখ্য যে বিগত ২০১৪ বৰ্ষৰ লোকসভা নিৰ্বাচনত অসমৰ ১৪টা সমষ্টিৰ ৭টাত বিজেপি, কংগ্ৰেছ আৰু এ আই য়ু ডি এফে তিনিটাকৈ আৰু এটা সমষ্টিত নিৰ্দলীয় প্ৰাৰ্থী জয়ী হৈছিল।