ইৰাণ যুদ্ধক ‘ভুল’ পদক্ষেপ বুলি ভাবে ৬১ শতাংশ আমেৰিকান লোকে; সমীক্ষাত পোহৰলৈ আহিছে তথ্য

ইৰাণৰ বিৰুদ্ধে চলি থকা আমেৰিকাৰ সামৰিক অভিযান ভুল সিদ্ধান্ত বুলি ভাৱে আমেৰিকাৰ গৰিষ্ঠসংখ্যক লোকে।

শেহতীয়াকৈ ৱাশ্বিংটন পোষ্ট, এবিচি নিউজ আৰু ইপছ’ছে কৰা এক সমীক্ষাত দেখা গৈছে যে ৬১ শতাংশ আমেৰিকান লোকে ইৰাণৰ বিৰুদ্ধে আমেৰিকাই সামৰিক শক্তি ব্যৱহাৰ কৰাটো ‘ভুল’ সিদ্ধান্ত আছিল বুলি ভাৱে।

শনিবাৰে (২ মে’) আমেৰিকাৰ সংবাদ মাধ্যম চিএনএনৰ এক প্ৰতিবেদনত সমীক্ষাৰ ফলাফলৰ ওপৰত আলোকপাত কৰা হৈছে, যিটো বৰ্তমান প্ৰশাসনৰ যুদ্ধকালীন নীতিৰ ওপৰত জনসাধাৰণৰ তীব্ৰ চাপৰ প্ৰতিফলন হিচাপে দেখা গৈছে।

ৱাশ্বিংটন পোষ্টে সমীক্ষাৰ ফলাফলত এক ঐতিহাসিক সাদৃশ্য বিচাৰি উলিয়াইছে। তেওঁলোকে লক্ষ্য কৰে যে এই জনমত ২০০৬ চনৰ মে’ মাহত ইৰাক যুদ্ধৰ ওপৰত কৰা এক সমীক্ষাৰ সৈতে প্ৰায় একে, যেতিয়া ৫৯ শতাংশ আমেৰিকান লোকে ইৰাক যুদ্ধক ভুল বুলি কৈছিল।

ইয়াৰ উপৰিও ১৯৭১ চনত এক গ্যালাপ সমীক্ষাত দেখা গৈছিল যে প্ৰতি ১০ জন আমেৰিকান লোকৰ ভিতৰত ছয় জনেই ভিয়েটনাম যুদ্ধক একেধৰণৰ ভুল বুলি অভিহিত কৰিছিল।

অৰ্থাৎ বৰ্তমানৰ ইৰাণ যুদ্ধৰ প্ৰতি আমেৰিকাৰ জনসাধাৰণৰ অসন্তুষ্টি ২০০৬ চনৰ ইৰাক যুদ্ধ বা ১৯৭১ চনৰ ভিয়েটনাম যুদ্ধৰ ভয়াবহতাৰ সৈতে তুলনাযোগ্য স্তৰত উপনীত হৈছে।

এই সমীক্ষাত ৰাজনৈতিক মতাদৰ্শৰ ভিত্তিত জনমতৰ বৃহৎ পাৰ্থক্যও দেখা গৈছে। বৰ্তমানৰ সমীক্ষা অনুসৰি ১০ জন ডেম’ক্ৰেটৰ ভিতৰত ৯ জনেই ইৰাণৰ বিৰুদ্ধে সামৰিক ব্যৱস্থা ভুল বুলি ভাৱে। ইয়াৰ উপৰিও ৭১ শতাংশ নিৰ্দলীয় ভোটাৰ আৰু ১৯ শতাংশ ৰিপাব্লিকান সমৰ্থকৰো একেই মতামত।