পাকিস্তানৰ প্ৰদূষিত বায়ুৰ প্ৰভাৱত দিল্লীৰ বায়ু প্ৰদূষণ! উচ্চতম ন্যায়ালয়ত আজৱ দাবী উত্তৰ প্ৰদেশ চৰকাৰৰ

পাকিস্তানৰ পৰা অহা প্ৰদূষিত বায়ুৱে দিল্লীৰ বায়ুৰ মানদণ্ড প্ৰভাৱিত কৰে! এক কথাত দিল্লীৰ বায়ু প্ৰদূষণৰ বাবে দায়ী পাকিস্তানৰ পৰা অহা প্ৰদূষিত বায়ু! উচ্চতম ন্যায়ালয়ত এই আজৱ দাবী কৰিছে উত্তৰ প্ৰদেশ চৰকাৰে।

উত্তৰ প্ৰদেশ চৰকাৰৰ হৈ উপস্থিত থকা জ্যেষ্ঠ অধিবক্তা ৰঞ্জিত কুমাৰে দিল্লীত বায়ুৰ মানদণ্ড প্ৰভাৱিত কৰাৰ বাবে পাকিস্তানৰ ফালৰ পৰা অহা প্ৰদূষিত বায়ুক দোষাৰোপ কৰিছে।

ইয়াৰ প্ৰত্যুত্তৰত উচ্চতম ন্যায়ালয়ৰ মুখ্য ন্যায়াধীশ ৰমনাই উত্তৰ প্ৰদেশ চৰকাৰক “পাকিস্তানৰ উদ্যোগ সমূহ নিষিদ্ধ কৰিব বিচাৰে নেকি” বুলি কটুক্তি কৰে।

অধিবক্তা ৰঞ্জিত কুমাৰে উত্তৰ প্ৰদেশৰ উদ্যোগসমূহৰ ৰাষ্ট্ৰীয় ৰাজধানীৰ প্ৰদূষণত কোনো ভূমিকা নাই বুলি দাবী কৰে। উত্তৰ প্ৰদেশৰ উদ্যোগসমূহৰ প্ৰদূষিত বায়ু দিল্লীৰ ফালে নাযায় বুলি উল্লেখ কৰি উত্তৰ প্ৰদেশ চৰকাৰে উদ্যোগসমূহ বন্ধ কৰাত আপত্তি কৰে।

তেওঁ কয় যে ৰাষ্ট্ৰীয় ৰাজধানী অঞ্চল আৰু ইয়াৰ কাষৰীয়া অঞ্চলত বায়ু গুণমান ব্যৱস্থাপনা আয়োগে উদ্যোগসমূহক মাত্ৰ ৮ ঘণ্টা কাম কৰিবলৈ অনুমতি দিয়াৰ সিদ্ধান্তই কুঁহিয়াৰ আৰু দুগ্ধ উদ্যোগসমূহক প্ৰভাৱিত কৰিব।

ভাৰতৰ মুখ্য ন্যায়াধীশ এন ভি ৰমনাৰ নেতৃত্বত এখন বিচাৰপীঠে দিল্লী-এনচিআৰ অঞ্চলত বায়ু প্ৰদূষণৰ ওপৰত এখন আবেদনৰ শুনানি গ্ৰহণ কৰি আছে।

এই শুনানিৰ সময়তে উত্তৰ প্ৰদেশ চৰকাৰে বায়ু প্ৰদূষণৰ বাবে পাকিস্তানক দোষাৰোপ কৰে। উল্লেখ্য যে বৰ্তমান বিজেপিৰ নেতা সকলে দেশৰ যিকোনো পৰিস্থিতিৰ বাবে পাকিস্তানক দোষাৰোপ কৰাটো এটা ট্ৰেণ্ডত পৰিণত হৈছে। চৰকাৰৰ কোনো ভুল নীতিৰ সমালোচনা কৰা সকলকো বিজেপিৰ নেতা সকলে পাকিস্তান পন্থী বুলি অভিহিত কৰে।

সততে পাকিস্তানৰ নাম উল্লেখ কৰি নিজৰ দোষ ঢাকিব বিচৰা বিজেপিৰ নেতা-কৰ্মীৰ এনে কাৰ্য বিভিন্ন সময়ত সমালোচিত হৈছে। এতিয়া দিল্লীৰ বায়ু প্ৰদূষণৰ বাবে পাকিস্তানক দোষাৰোপ কৰা কাৰ্যক সামাজিক মাধ্যমত বিভিন্নজনে ব্যঙ্গাত্মক সমালোচনা কৰিছে।