গুৰুগ্ৰামত খহি পৰিল নিৰ্মীয়মান ফ্লাইঅভাৰ, লকডাউনৰ বাবে প্ৰাণৰক্ষা বহুজনৰ

এক ভয়ংকৰ বিপৰ্যয়ৰ পৰা কথমপি ৰক্ষা পৰিল গুৰুগ্ৰামবাসী।

যোৱানিশা হাৰিয়ানাৰ গুৰুগ্ৰাম চহৰৰ মাজমজিয়াত নিৰ্মাণ কৰি থকা এখন ফ্লাইঅভাৰৰ এটা অংশ খহি পৰাৰ ফলত ফ্লাইঅভাৰৰ তলত থকা বহু মূল্যৱান সামগ্ৰী ধ্বংস হয়।

অৱশ্যে সৌভাগ্যক্ৰমে এই দুৰ্ঘটনাত দুজন লোকক বাদ দি অধিক লোক হতাহত হোৱা নাই । গুৰুগ্ৰামৰ প্ৰশাসনৰ এগৰাকী শীৰ্ষ বিষয়াই প্ৰকাশ কৰা মতে নিশাৰ ভাগত ফ্লাইঅভাৰ খনৰ এটা অংশ খহি পৰাৰ বাবেই অধিক লোক হতাহত নহ’ল।

আহত লোক দুজনক ওচৰৰে চিকিৎসালয়ত ভৰ্তি কৰোৱা হৈছে।

ক’ৰ’ণাতংকৰ বাবে গুৰুগ্ৰাম চহৰত বিগত প্ৰায় এসপ্তাহ ধৰি লকডাউন চলি আছে । সেইবাবেই সদা ব্যস্ত চহৰ খনৰ ৰাজপথ যোৱা নিশা একপ্ৰকাৰ শূন্য আছিল।

গুৰুগ্ৰাম চহৰৰ মাজ মজিয়াত ৬ কিলোমিটাৰ দৈৰ্ঘ্যৰ ফ্লাইঅভাৰ খন নিৰ্মাণ কৰি থকা হৈছে।

সুভাষ চ’ক-বাদছাহপুৰ সংযোগী ফ্লাইঅভাৰখনৰ নিৰ্মাণত নিম্ন মানৰ সামগ্ৰী ব্যৱহাৰ কৰা বুলি স্থানীয় একাংশ ৰাইজে অভিযোগ কৰিছে।

সেইবাবেই যোৱা নিশাৰ দুৰ্ঘটনাটো সংঘটিত হ’বলৈ পালে বুলি বহুতে মন্তব্য কৰিছে।

ইতিমধ্যে গুৰুগ্ৰামৰ প্ৰশাসনৰ শীৰ্ষ পদাধিকাৰ সকলৰ লগতে ফ্লাইঅভাৰ খনৰ নিৰ্মাণৰ সৈতে জৰিত কোম্পানীৰ বিষয়াসকল ঘটনাস্থলীত উপস্থিত হৈ ঘটনাটোৰ তদন্ত আৰম্ভ কৰিছে।

গুৰুগ্ৰামৰ চোহনা ৰোডৰ সুভাষ চ’ক আৰু ভনছিৰ মাজত সংঘটিত  দুৰ্ঘটনাই জোকাৰি গৈছে সমগ্ৰ চহৰ খনকে।

নিৰ্মাণ প্ৰতিষ্ঠানৰ গাফিলতিৰ বাবেই কেইবছৰমান পূৰ্বে কলকাতাতো নিৰ্মীয়মান ফ্লাইঅভাৰ খহি পৰি বহু লোকৰ মৃত্যু ঘটিছিল।