বিধেয়কৰ বিৰোধিতা কৰা অসমীয়া ছাত্ৰ-ছাত্ৰীক সকীয়নি প্ৰাক্তন বাঙালী ছাত্ৰ নেতাৰ

অসম বিশ্ববিদ্যালয়ত অধ্যয়নৰত অসমীয়া ছাত্ৰ-ছাত্ৰীয়ে যোৱা ৯ জানুৱাৰিত নাগৰিকত্ব বিধেয়কৰ বিৰুদ্ধে প্ৰতিবাদ সাব্যস্ত কৰাক লৈ বৰাকত সম্প্ৰতি তীব্ৰ প্ৰতিক্ৰিয়াৰ সৃষ্টি হৈছে। এতিয়া এইসকল অসমীয়া ছাত্ৰ-ছাত্ৰীক এক প্ৰকাৰ ভাবুকি প্ৰদান কৰিছে পৃথক বৰাকৰ দাবী উত্থাপন কৰি অহা প্ৰাক্তন ছাত্ৰ নেতা তথা বিজেপিৰ সদস্য প্ৰদীপ দত্ত ৰয়ে।

যদিহে নাগৰিকত্ব সংশোধনী বিধেয়কৰ বিৰোধিতাত বিশ্ববিদ্যালয়খনৰ অসমীয়া ছাত্ৰ-ছাত্ৰীয়ে প্ৰতিবাদ সাব্যস্ত কৰি থাকে তেন্তে তেওঁলোক অসম বিশ্ববিদ্যালয়ৰ পৰা আঁতৰি থাকিব লাগিব বুলি ৰয়ে এক প্ৰকাৰ হুংকাৰ প্ৰদান কৰে।

আজি এক ভিডিঅ’যোগে তেওঁ নিজৰ মত প্ৰকাশ কৰি কয় যে অসম বিশ্ববিদ্যালয়ত অধ্যয়নৰত অসমীয়া ছাত্ৰ-ছাত্ৰীক নাগৰিকত্ব সংশোধনী বিধেয়কৰ বিৰুদ্ধে মাত মতা দেখি মই আঁচৰিত হৈছো।

‘তোমালোক ইয়ালৈ পঢ়িবলৈ আহিছা, সেয়ে পঢ়াত মনোযোগ দিয়া। ৰাজনীতিত প্ৰৱেশ কৰাৰ চেষ্টা নকৰিবা। বহু আন্দোলন ঘাত-প্ৰতিভাত তথা আছুৰ বিৰোধৰ পাছত আমি অসম বিশ্ববিদ্যালয় লাভ কৰিছো আৰু তোমালোকে সেই বিশ্ববিদ্যালয়ৰ পৰাই বিধেয়কখনৰ বিৰোধিতা কৰিব নোৱাৰিবা’। এইদৰে কয় প্ৰদীপ দত্ত ৰয়ে।

তেওঁ লগতে কয় যে বৰাক বিৰোধী কোনো কাৰ্য ইয়াত কৰিবলৈ দিয়া নহ’ব। যিখন নাগৰিকত্ব সংশোধনী বিধেয়ক সমগ্ৰ দেশতে প্ৰযোজ্য হ’ব সেই বিধেয়কখনক লৈ অসমবাসীয়ে বিৰোধিতা কৰাটো নিন্দনীয় বুলি আখ্যা দিয়াৰ লগতে বিৰোধ প্ৰদৰ্শন কৰা অসমীয়া ছাত্ৰ-ছাত্ৰী কেইজনৰ বিৰুদ্ধে তৎকালীন ব্যৱস্থা গ্ৰহণ কৰিবলৈ অসম বিশ্ববিদ্যালয়ৰ উপাচাৰ্যক আহ্বান জনায়।

যদিহে পুনৰাই অসম বিশ্ববিদ্যালয়ৰ অসমীয়া ছাত্ৰ-ছাত্ৰীয়ে নাগৰিকত্ব সংশোধনী বিধেয়কখনৰ বিৰোধিতা কৰে তেন্তে ভৱিষ্যতত কোনো অসমীয়া খিলঞ্জীয়াকে অসম বিশ্ববিদ্যালয়ত প্ৰৱেশ কৰিবলৈ দিয়া নহ’ব বুলিও সকীয়নি প্ৰদান কৰে প্ৰদীপ দত্ত ৰয়ে।