অপৰিৱৰ্তিত প্ৰণৱ মুখাৰ্জীৰ স্বাস্থ্য : এতিয়াও ভেন্টিলেশ্যনতে আছে প্ৰাক্তন ৰাষ্ট্ৰপতি গৰাকী
দেশৰ প্ৰাক্তন ৰাষ্ট্ৰপতি ভাৰতৰত্ন প্ৰণৱ মুখাৰ্জীৰ স্বাস্থ্যৰ কোনো উন্নতি হোৱা নাই।
ভেন্টিলেশ্যনত ৰখা প্ৰাক্তন ৰাষ্ট্ৰপতি গৰাকী এতিয়াও সংকটজনক অৱস্থাতে চিকিৎসাধীন হৈ আছে।
তেওঁৰ চিকিৎসাৰ বাবে নিয়োজিত চিকিৎসকৰ মতে প্ৰণৱ মুখাৰ্জীৰ হৃদযন্ত্ৰ, শৰীৰৰ ৰক্ত সঞ্চালন, ৰক্তচাপ এতিয়াও স্থিতিশীল অৱস্থাতে আছে।
ইফালে ৰাতি প্ৰণৱ মুখাৰ্জীৰ পুত্ৰ অভিজিৎ মুখাৰ্জীয়ে টুইট কৰি কয়, “সকলোৰে প্ৰাৰ্থনাৰ বাবে আমাৰ দেউতাৰ হৃদযন্ত্ৰ, শৰীৰৰ ৰক্ত সঞ্চালন, ৰক্তচাপ স্থিতিশীল অৱস্থাত আছে। সকলোৰে ওচৰত অনুৰোধ, আপোনালোকে প্ৰাৰ্থনা কৰক, আমাৰ দেউতা যাতে শীঘ্ৰেই সুস্থ হৈ উঠে।”
With All Your Prayers , My Father is haemodynamically stable now . I request everyone to continue with your prayers & good wishes for his speedy recovery . Thank You ?#PranabMukherjee
— Abhijit Mukherjee (@ABHIJIT_LS) August 12, 2020
উল্লেখ্য যে যোৱা দেওবাৰে কোভিড১৯ত আক্ৰান্ত হোৱাৰ পিছত প্ৰাক্তন ৰাষ্ট্ৰপতিগৰাকীক দিল্লীৰ সেনা হাস্পতালত ভৰ্তি কৰোৱা হৈছিল।
মস্তিষ্কৰ এক অস্ত্ৰোপচাৰ কৰিবলৈ স্বাস্থ্য পৰীক্ষা কৰাৰ পূৰ্বে কোভিড টেষ্ট কৰোতে প্ৰাক্তন ৰাষ্ট্ৰপতি গৰাকীৰ শৰীৰত কোভিড১৯ৰ উপস্থিতি ধৰা পৰে।
কালি হাস্পতালৰ কৰ্তৃপক্ষই জানিবলৈ দিছিল যে ৮৪ বৰ্ষীয় প্ৰাক্তন ৰাষ্ট্ৰপতি গৰাকীৰ স্বাস্থ্যৰ অৱস্থা অৱনতি ঘটিছে।
অস্ত্ৰোপচাৰ সম্পন্ন হোৱাৰ পিছৰে পৰা তেওঁৰ স্বাস্থ্যৰ অৱস্থা উন্নতি হোৱা নাই বুলি জনোৱা হৈছিল।
ইয়াৰ পিছতে প্ৰাক্তন ৰাষ্ট্ৰপতি গৰাকীৰ স্বাস্থ্যকলৈ দেশবাসীৰ মাজত উদ্বিগ্নতাৰ বৃদ্ধি পাইছে।
দেশৰ ৰাষ্ট্ৰপতি ৰামনাথ কোবিন্দ, প্ৰতিৰক্ষা মন্ত্ৰী ৰাজনাথ সিঙকে আদি কৰি বহুজনে প্ৰাক্তন ৰাষ্ট্ৰপতিগৰাকীৰ আশু আৰোগ্য কামনা কৰি বাৰ্তা প্ৰেৰণ কৰিছে।
ইপিনে সামাজিক মাধ্যমতো অনুৰাগীসকলে প্ৰাক্তন ৰাষ্ট্ৰপতিগৰাকীৰ স্বাস্থ্যৰ আশু আৰোগ্য কামনা পোষ্ট কৰা দেখা গৈছে।