জলসিঞ্চনৰ নিযুক্তিত ব্যাপক কেলেংকাৰী : উচ্চ ন্যায়ালয়ৰ নিৰ্দেশৰ পাছতো প্ৰতিবন্ধীক বঞ্চনাৰ অভিযোগ

বাৰে বাৰে ৰাজ্য চৰকাৰৰ বিভিন্ন বিভাগত নিযুক্তিৰ ক্ষেত্ৰত বঞ্চিত হৈ আহিছে প্ৰতিবন্ধীসকল।

উচ্চ ন্যায়ালয়ৰ নিৰ্দেশক বুঢ়া আঙুলি দেখুওৱাৰ গুৰুতৰ অভিযোগ উত্থাপিত হৈছে জলসিঞ্চন বিভাগৰ। বুধবাৰে দিছপুৰ প্ৰেছ ক্লাৱত এক সংবাদমেল সম্বোধন কৰি এই গুৰুতৰ অভিযোগ উত্থাপন কৰিছে প্ৰতিবন্ধী সুৰক্ষা সংস্থা অসমৰ সাধাৰণ সম্পাদক নৃপেন মালাকাৰে।

জলসিঞ্চন বিভাগৰ মুখ্য অভিযন্তাৰ বিৰুদ্ধে নিযুক্তি প্ৰক্ৰিয়াত প্ৰতিবন্ধীসকলক প্ৰতাৰণাৰ অভিযোগ উত্থাপন কৰে মালাকাৰে।

সংবাদমেলখনত নৃপেন মালাকাৰে কয় ‘শাসনলৈ আহিয়েই সৰ্বানন্দ সোণোৱাল নেতৃত্বাধীন বিজেপি চৰকাৰে দ্ৰুতগতিত নিবনুৱা সমস্যা সমাধান কৰিব বুলি ঘোষণা কৰিছিল যদিও সেয়া অসাৰ প্ৰতিপন্ন হ’ল।‘

‘উচ্চ ন্যায়ালয়ৰ নিৰ্দেশ অনুসৰি জলসিঞ্চন বিভাগে অনুষ্ঠিত কৰা ৬৪৩ টা পদৰ বিপৰীতে ৪% হাৰত ২৬ টা পদ প্ৰতিবন্ধীসকলৰ বাবে সংৰক্ষণ আছিল যদিও শেহতীয়াকৈ জলসিঞ্চন বিভাগে ১২ অক্টোবৰ তাৰিখে প্ৰকাশ কৰা নিযুক্তি পৰীক্ষাৰ ফলাফলত কিন্তু এজনো প্ৰতিবন্ধী লোকৰ নাম নিযুক্তিৰ তালিকাত দেখিবলৈ পোৱা নগ’ল।‘ এই গুৰুতৰ অভিযোগ উত্থাপন কৰে মালাকাৰে।

মালাকাৰৰ প্ৰশ্ন ‘জলসিঞ্চন বিভাগৰ নিযুক্তি প্ৰক্ৰিয়াত ৫৪৩ টা পদৰ বিপৰীতে ৪ শতাংশ ন্যায়ালয়ৰ নিৰ্দেশনা থকাৰ পিছতো কিয় প্ৰতিবন্ধীসকলৰ নিযুক্তিৰ তালিকাত নাম নাথাকিল?’ নিজৰ মুনাফাৰ কাৰণে একাংশ দালালৰ বাবেই এই সকল লোক প্ৰতাৰণাৰ বলি হ’ব লগা হৈছে নেকি?’

মালাকাৰৰ দাবী ‘দুৰ্গা পূজাৰ পিছতো যদি জলসিঞ্চন বিভাগৰ নিযুক্তি তালিকাত তেওঁলোকৰ নাম প্ৰকাশ নাপায় তেনেহ’লে জংগী আন্দোলন কৰিব প্ৰতিবন্ধী সুৰক্ষা সংস্থাই।‘

প্ৰশ্ন হয় কিমান দিনলৈ এই প্ৰতিবন্ধী লোক সকলে নিজৰ প্ৰাপ্যৰ বাবে কৰিব লাগিব আন্দোলন?