প্ৰধানমন্ত্ৰী মোদীয়ে কৰিব নোৱাৰা কাম কৰি দেখুৱালে জাভেদ আখতাৰে: সঞ্জয় ৰাউট

শিৱসেনাৰ উদ্ধৱ থাকৰে ফৈদৰ নেতা সঞ্জয় ৰাউটে জাভেদ আখতাৰক সন্মান প্ৰদান কৰিবলৈ দেশৰ প্ৰধানমন্ত্ৰী আৰু ৰাষ্ট্ৰপতিলৈ আহ্বান জনাইছে। ৰাউটে এই আহ্বান জনাই লগতে কয় যে জাভেদ আখতাৰে প্ৰকৃত দেশপ্ৰেম দেখুৱাইছে আৰু সকলোৱে তেওঁক সমৰ্থন কৰিব লাগে।

শিৱসেনাৰ মুখপত্ৰ ‘সামনা’ত লিখা এটা প্ৰবন্ধত তেওঁ কয় যে প্ৰধানমন্ত্ৰী মোদী আৰু তেওঁৰ অনুগামীসকলে পাকিস্তানত গৈ যি কৰিব নোৱাৰিলে, এজন মুছলমান লেখকে সেইটো কাম খোদ পাকিস্তানৰ বুকুত কৰি দেশপ্ৰেমৰ প্ৰকৃত উদাহৰণ দেখুওৱাই আহিছে।

উল্লেখ্য, জাভেদ আখতাৰে পাকিস্তানৰ লাহোৰৰ এক মুকলি মঞ্চত পাকিস্তানক তীব্ৰ ভাষাৰে সমালোচনা কৰে। লাহোৰৰ ফৈজ মহোৎসৱত তেওঁ কৈছিল যে মুম্বাই আক্ৰমণৰ ষড়যন্ত্ৰকাৰীসকলে পাকিস্তানত মুক্তভাৱে ঘূৰি ফুৰিছে।

জাভেদ আখতাৰৰ এই সাহসক প্ৰশংসা কৰি ৰাউটে কয় যে নিজ ভূমিতে পাকিস্তানক এইদৰে সমালোচনা কৰাতো সহজ কথা নহয়।

সঞ্জয় ৰাউটে লগতে কয় যে দিল্লী আৰু মুম্বাইত বহি পাকিস্তানক ভাবুকি দিয়াটো সহজ, কিন্তু শত্ৰুৰ ঘৰত বহি পাকিস্তানক ভাবুকি দিয়াটো সহজ নহয়। প্ৰকৃত দেশপ্ৰেমীয়েহে এনে কাম কৰিব পাৰে।

প্ৰবন্ধটোত ৰাউটে প্ৰধানমন্ত্ৰী মোদীৰ লগতে বিজেপিকো আক্ৰমণৰ লক্ষ্য কৰি লৈছে। তেওঁ কয় যে যিসকলে বিজেপিৰ কথা নুশুনে তেওঁলোকক দেশদ্ৰোহী বুলি ক’বলৈ আৰম্ভ কৰে।

ৰাউটৰ মতে, পাকিস্তান আৰু চীন দুয়োখন দেশ আমাৰ শত্ৰু, কিন্তু মোদীয়ে কেৱল পাকিস্তানৰ প্ৰতি ভাবুকি ভৰা মন্তব্য দি আহিলেও চীনক ভয় কৰাৰ বাবেই চীনৰ বিৰুদ্ধে কোনো মন্তব্য কৰিবলৈ সাহস নকৰে।

চীনৰ এপসমূহ নিষিদ্ধ কৰিলেও চীনৰ বিৰুদ্ধে টু শব্দ এটাও উচ্চাৰণ কৰিবলৈ প্ৰধানমন্ত্ৰী মোদীৰ সাহসেই নাই বুলি প্ৰবন্ধটোত কটাক্ষ কৰে সঞ্জয় ৰাউটে।