সত্য কোৱাৰ মূল্য! চৰকাৰী ভৱন এৰাৰ পিছতে অভিযোগ ৰাহুল গান্ধীৰ
সাংসদ পদ খাৰিজ হোৱাৰ পিছত অৱধাৰিতভাৱে আজি নতুন দিল্লীৰ চৰকাৰী বাসগৃহ খালী কৰে কংগ্ৰেছ নেতা তথা প্ৰাক্তন সাংসদ ৰাহুল গান্ধীয়ে। সাংসদ হিচাপে কাৰ্যনিৰ্বাহ কৰি থকাৰ সময়ত বাস কৰা এই ভৱন এৰাৰ সময়ত গান্ধীয়ে সঁচা কথা কোৱাৰ বাবে যিকোনো মূল্য দিবলৈ সাজু বুলি মন্তব্য কৰে।
তেওঁ লগতে সত্য কথা কোৱাৰ বাবেই এতিয়া মূল্য পৰিশোধ কৰিব লগা হৈছে বুলি উল্লেখ কৰে। সাংবাদিকৰ আগত গান্ধীয়ে কয়, “দেশৰ জনতাই মোক ১৯ বছৰে এই ঘৰটো দিছিল, মই তেওঁলোকক ধন্যবাদ দিব বিচাৰো। এয়া সঁচা কথা কোৱাৰ মূল্য। মই সঁচা কথা কোৱাৰ যিকোনো মূল্য দিবলৈ সাজু।”
উল্লেখ্য যে, ২০০৫ চনৰ পৰা ১২ টোঘলক লেনত থকা এই চৰকাৰী বাংলোত বাস কৰি আহিছিল ৰাহুল গান্ধীয়ে। যোৱা মাহত গুজৰাটৰ চুৰাটৰ আদালতে চাৰি বছৰ পুৰণি এক মানহানিৰ গোচৰত দোষী সাব্যস্ত কৰি দুবছৰৰ কাৰাদণ্ডৰ শাস্তি প্ৰদান কৰি গান্ধীক সংসদৰ নিম্ন সদনৰ পৰা অযোগ্য ঘোষণা কৰিছিল।
ইয়াৰ পিছতেই নিয়ম অনুসৰি কংগ্ৰেছ নেতাগৰাকীক তেওঁৰ বাংলো খালী কৰাৰ বাবে ২৭ মাৰ্চত লোকসভা সচিবালয়ে জাননী জাৰি কৰিছিল। আজি আছিল ৰাহুল গান্ধীয়ে বাংলো খালী কৰাৰ অন্তিম তাৰিখ।
বাংলো খালী কৰাৰ পিছত নিজৰ সামগ্ৰীসমূহ ১০ জনপথত থকা মাতৃ ছোনিয়া গান্ধীৰ বাসগৃহলৈ স্থানান্তৰিত কৰিছে গান্ধীয়ে। আজি পুৱা নিজ ভগ্নী তথা কংগ্ৰেছৰ সাধাৰণ সম্পাদক প্ৰিয়ংকা গান্ধী ভাদ্ৰাই গান্ধীক ঘৰ খালী কৰাত সহায় কৰা দেখিবলৈ পোৱা গৈছিল।