ভূটীয়া প্ৰধান মন্ত্ৰীৰ আমন্ত্ৰণত অতি সোনকালে ভূটান ভ্ৰমণলৈ যাব নৰেন্দ্ৰ মোদী

দ্বিতীযটো কাৰ্য্যকালৰ বাবে দেশৰ প্ৰধান মন্ত্ৰী হিচাপে নিৰ্বাচিত হোৱা নৰেন্দ্ৰ মোদীয়ে নতুন চৰকাৰৰ প্রথমটো বিদেশ ভ্ৰমণ সূচীলৈ ভূটানলৈ উৰা মৰাৰ সম্ভাৱনা আছে। ভাৰত আৰু ভূটান দুয়োখন দেশৰ পাৰস্পৰিক সহযোগিতাৰ ভিত্তিত ঠিক হোৱা এটা তাৰিখত মোদীয়ে ভূটান ভ্ৰমণ কৰিব বুলি সূত্ৰৰ পৰা জানিব পৰা গৈছে।

নতুন দিল্লীৰ হায়দৰাবাদ ভৱনত শুকুৰবাৰে প্ৰধানমন্ত্ৰী মোদী আৰু ভূটানৰ প্ৰধানমন্ত্ৰী ডা০ ল’তে’ চেৰিঙৰ মাজত অনুষ্ঠিত হোৱা এখন বৈঠকৰ পাছত মোদী ভূটান ভ্ৰমণলৈ যোৱাটো নিশ্চিত হয়।

উল্লেখযোগ্য যে, ইয়াৰ পূৰ্বেও প্ৰধান মন্ত্ৰীলৈ ভূটান ভ্ৰমণৰ বাবে প্ৰস্তাৱ আহিছিল যদিও মোদীয়ে এটা সমিলমিল দিনত দেশখনলৈ যোৱাৰ ইচ্ছা প্ৰকাশ কৰে। পাহাৰীয়া দেশখনৰ প্ৰধান মন্ত্ৰীগৰাকীয়ে মোদীৰ শপত গ্ৰহণ অনুষ্ঠান উপস্থিত থকাৰ বাবে ভাৰত ভ্ৰমণ কৰে।

দুয়োখন দেশৰ প্ৰধান মন্ত্ৰীয়ে দেশ দুখনৰ মাজত বন্ধুত্ব, পাৰস্পৰিক বুজাবুজি, সন্মান আদিৰ ক্ষেত্ৰত থকা দ্বিপাক্ষিক সম্পৰ্কক লৈ সন্তুষ্টি প্ৰকাশ কৰাৰ লগতে ভবিষ্যেও দুয়োখন দেশে সহযোগিতাৰে বিকাশৰ কাৰণে কাম কৰি যোৱাৰ প্ৰতিশ্ৰুতি দিয়ে।

প্ৰধান মন্ত্ৰীৰ শপত গ্ৰহণ অনুষ্ঠানত ভূটানৰ প্ৰধান মন্ত্ৰীৰ লগতে বিমষ্টেক দেশ কিৰ্গিষ্টান, মৰিচাছ আদি দেশৰ ৰাষ্ট্ৰ প্ৰধান সকলে অংশগ্ৰহণ কৰে।