গোগামুখত ৰাজ্যিক মৰ্য্যাদাৰে শেষকৃত্য সম্পন্ন অধ্যাপক টাবুৰাম টাইদৰ
ধেমাজি জিলাৰ গোগামুখত দেওবাৰে সন্ধিয়া ৰাজ্যিক মৰ্য্যাদাৰে সম্পন্ন হৈছে অধ্যাপক টাবুৰাম টাইদৰ শেষকৃত্য।
গোগামুখ সাপ্তাহিক বজাৰৰ সমীপৰ আব’তানি লতাত ভাষাৰ পণ্ডিতজনৰ শেষকৃত্য সম্পন্ন কৰা হৈছে।
মিছিং স্বায়ত্তশাসিত পৰিষদে শিক্ষাবিদ, অধ্যাপক টাইদৰ শেষকৃত্য সম্পৰ্কীয় যাৱতীয় সকলো কাম সম্পন্ন কৰে।
শনিবাৰে দেহাৱসান ঘটা টাইদৰ দেহটো হেলিকপ্তাৰযোগে গুৱাহাটীৰ পৰা লখিমপুৰলৈ লৈ যোৱা হৈছিল।
ঘূণাসুঁতি উচ্চ মাধ্যমিক বিদ্যালয় খেলপথাৰত তেওঁলৈ মিছিং পৰম্পৰা অনুযায়ী শেষ শ্ৰদ্ধা জনোৱা হয়। পিছত তাৰপৰা সৎকাৰৰ বাবে মৃতদেহটো গোগামুখলৈ অনা হয়।
মিছিং ভাষাৰ প্ৰসাৰ আৰু সংৰক্ষণৰ লগতে অসমীয়া ভাষা-সাহিত্যলৈয়ো অৰিহনা আগবঢ়োৱা টাইদৰ নামত এটা সংগ্ৰহালয় স্থাপন কৰা হ’ব। তাৰোপৰি তেওঁৰ প্ৰতিমূৰ্তি স্থাপনৰ বাবেও ব্যৱস্থা লোৱা হ’ব।
বহুলোকৰ উপস্থিতিত সৎকাৰ অনুষ্ঠানতে এই কথা ঘোষণা কৰে মিছিং স্বায়ত্তশাসিত পৰিষদৰ মুখ্য কাৰ্য্যবাহী সদস্য পৰমানন্দ চায়েঙিয়াই।
“মিছিং স্বায়ত্তশাসিত পৰিষদে এই সন্দৰ্ভত আঁচনি ঘোষণা কৰিব,” চায়েঙিয়াৰ ঘোষণা।
টাইদৰ শেষকৃত্য অনুষ্ঠানত অসম চৰকাৰৰ মন্ত্ৰী ৰঞ্জিত দত্ত, ধেমাজিৰ বিধায়ক ৰণোজ পেগু, জোনাইৰ বিধায়ক ভুৱন পেগু, ডিব্ৰুগড়ৰ বিধায়ক প্ৰশান্ত ফুকন আৰু লাহোৱালৰ বিধায়ক ঋতুপৰ্ণ বৰুৱা উপস্থিত আছিল।
তাৰোপৰি মিছিং স্বায়ত্তশাসিত পৰিষদৰ সদস্যসকল, ধেমাজিৰ উপায়ুক্ত এম কে সিং আৰু বিভিন্ন অনুষ্ঠান-প্ৰতিষ্ঠান-সংগঠনৰ নেতৃত্ব আৰু ৰাইজ অনুষ্ঠানটোত উপস্থিত আছিল।