পুৰণিগুদামত অবৈধ সুৰাৰ বেহা নিৰ্মূলকৰণ আৰু সুস্থিৰ পৰিৱেশ সৃষ্টিৰ পৰিকল্পনাৰে মুকলি সভা
ৰাজ্যত চলি থকা অবৈধ সুৰাৰ ব্যাপক প্ৰচলনৰ লগতে শেহতীয়াকৈ সুৰা সেৱনৰ ফলত ৰাজ্যৰ বিভিন্ন প্ৰান্তত প্ৰায় দুই শতাধিক লোকৰ মৃত্যু হোৱাৰ প্ৰতি লক্ষ্য ৰাখি মাদক দ্ৰব্যৰ বিৰুদ্ধে পুৰণিগুদামত দেওবাৰে বিয়লি এখন মুকলি সভা অনুষ্ঠিত হয়।
পুৰণিগুদাম গড়মুৰ গাঁৱৰ মহিলা সমিতিৰ উদ্যোগত আৰু অঞ্চলটোৰ বিভিন্ন মহিলা গোটৰ সহযোগত পুৰণিগুদামৰ বৃহত্তৰ অঞ্চলত অবাধে চলি থকা সুৰাৰ বেহা নিৰ্মূলকৰণ তথা সুস্থিৰ সামাজিক বাতাবৰণৰ সৃষ্টি কৰি শৈক্ষিক পৰিবেশ গঢ়ি তোলাৰ মানসেৰে গড়মুৰ স্থিত শ্ৰী শ্ৰী পীতাম্বৰ দেৱ গোস্বামী গড়মুৰ সত্ৰৰ সন্মুখত উক্ত সভাখন অনুষ্ঠিত হয়।
পুৰণিগুদামৰ বিশিষ্ট শিক্ষাবিদ ফনীন্দ্ৰ নাথ গায়নৰ সভাপতিত্বত আবকাৰী বিভাগৰ উপ অধীক্ষক মনোজ চহৰীয়া, বঢ়মপুৰ খণ্ড উন্নয়ন প্ৰকল্প বিষয়া চন্দন বৰবৰা, পুৰণিগুদাম গাঁওপঞ্চায়ৰ সভাপতি বেদান্ত গায়ন, জিলা পৰিষদৰ সদস্যা জিন্তী বৈৰাগী, আঞ্চলিক সদস্যা ৰূপজ্যোতি বৰুৱা, স্থুল শইকীয়া, সঞ্জীৱ বৰা প্ৰমুখ্য কৰি চাৰি শতাধিক পুৰুষ মহিলা উপস্থিত থাকে। এই সভাতে পুৰণিগুদামৰ বৃহত্তৰ অঞ্চলৰ পৰা অবৈধ সুৰাৰ বেহা নিৰ্মূল কৰাৰ সিদ্ধান্ত গ্ৰহণ কৰে।
সুৰাই কেৱল সুৰাপায়ী ব্যক্তি জনৰেই ক্ষতি নকৰে, ইয়াৰ ফলত এখন ঘৰ তথা এটি পৰিয়ালো সম্পৰ্ণ ভাৱে নিঃশেষ হৈ যাব পাৰে, সেই সম্বন্ধে সভাত উপস্থিত থকা লোকসকলৰ মাজত পুংখানুপুখ ভাবে চৰ্চা কৰি সজাগতা সৃষ্টিৰ চেষ্টা কৰা দেখা যায়।
ইফালে সভাত পুৰণিগুদামত নীতি বহিৰ্ভূত ভাৱে জনৈক বৰা উপাধিৰ এজন অসাধু যুৱ-ব্যৱসায়ীয়ে ভুৱা প্ৰ-পত্ৰ জমা দি সুৰা বিক্ৰী কৰাৰ অনুজ্ঞা পত্ৰ উলিয়াই লৈ অবৈধভাৱে ৰমৰমীয়া ব্যৱসায় চলাই থকা বুলিও ৰাজহুৱা অভিযোগ উত্থাপন কৰে। এই সন্দৰ্ভত ব্যৱসায়ী জনৰ অনুজ্ঞাপত্ৰ কৰ্তন কৰাৰ লগতে ভুৱা প্ৰ-পত্ৰ জমা দি অনুজ্ঞাপত্ৰ উলিওৱা কাৰ্যৰ উচিত তদন্তৰ দাবী জনাই স্থানীয় ৰাইজে বিভাগীয় কৰ্তৃপক্ষলৈ পত্ৰ প্ৰেৰণ কৰে।