কেন্দ্ৰীয় চৰকাৰৰ কৃষক বিৰোধী আইন বাতিলৰ দাবীত বোকাখাতত প্ৰতিবাদ, ৰাষ্ট্ৰীয় পথ অৱৰোধ

কেন্দ্ৰীয় চৰকাৰে শেহতীয়াকৈ গ্ৰহণ কৰা কৃষক বিৰোধী আইনৰ বাবে সমগ্ৰ দেশজুৰি চলা গণ আন্দোলনৰ কাৰ্যসুচী আজি বোকাখাততো ৰূপায়িত কৰা হয় ৷

বিজেপি চৰকাৰে গ্ৰহণ কৰা তিনিখন বিধেয়কৰ বিৰুদ্ধে নিখিল ভাৰত কৃষক সভাৰ দ্বাৰা আহ্বান কৰা ভাৰত বন্ধৰ প্ৰতি পূৰ্ণ সমৰ্থন জনাই কৃষক সংঘৰ্ষ সমন্বয়ক সমিতিৰ উদ্যোগত আজি বোকাখাতৰ জীপাল কৃষক শ্ৰমিক সংঘ, ভাৰতীয় গণনাট্য সংঘ, আদিবাসী কৃষক সমাজে বোকাখাতত এক প্ৰতিবাদী কাৰ্যসূচী ৰূপায়ন কৰে ৷

বোকাখাত নগৰৰ মাজ মজিয়াত ৰূপায়ন কৰা এই কাৰ্যসুচীত কেন্দ্ৰৰ বিজেপি চৰকাৰৰ কৃষক বিৰোধী নীতিৰ বিৰুদ্ধে বিভিন্ন শ্ল’গানেৰে পৰিবেশ উত্তাল কৰি উত্তাল কৰি তোলে প্ৰতিবাদকাৰী সকলে ৷

পৰৱৰ্তী সময়ত প্ৰতিবাদকাৰীসকলে ৩৭ নং ৰাষ্ট্ৰীয় পথ অৱৰোধ কৰাত প্ৰায় দুঘণ্টা ধৰি বোকাখাতত উজনি-নামনিৰ পথ যোগাযোগ ব্যাহত হৈ পৰে।

প্ৰতিবাদস্থলীত বোকাখাতৰ দণ্ডাধীশ উপস্থিত হোৱাত প্ৰতিবাদকাৰীসকলে দণ্ডাধীশৰ হাতত কৰ্প’ৰেট গোষ্ঠীৰ স্বাৰ্থত কেন্দ্ৰীয় চৰকাৰে গ্ৰহণ কৰা কৃষক বিৰোধী আইন বাতিলৰ দাবীত স্মাৰক পত্ৰ প্ৰদান কৰে ৷

শেষত জীপাল কৃষক শ্ৰমিক সংঘৰ সোনেশ্বৰ নৰহ, প্ৰনৱ দলে আৰু নিখিল ভাৰত কৃষক সভাৰ ৰাজ্যিক যুটীয়া সম্পাদক বলো বৰাৰ নেতৃত্বত বোকাখাতৰ ৰাজপথত প্ৰতিবাদকাৰীসকলে সমদল উলিয়ায়।