হিন্দী আগ্ৰাসনৰ বিৰুদ্ধে চৰম প্ৰতিবাদ: তামিলনাডুত আত্মজাহ ৮৫ বছৰীয়া কৃষকৰ

সমগ্ৰ দেশতে হিন্দীক শিক্ষাৰ মাধ্যম হিচাপে গ্ৰহণ কৰা হ’ব বুলি কেন্দ্ৰীয় চৰকাৰে শেহতীয়া কিছুদিন ধৰি আকোঁৰগোজ স্থিতিৰে ঘোষণা কৰি অহাৰ সময়তে হিন্দী ভাষিক আগ্ৰাসনৰ বিৰুদ্ধে চৰম প্ৰতিবাদ সাব্যস্ত কৰি আজি তামিলনাডুত আত্মজাহ দিয়ে এগৰাকী কৃষকে।

ৰাজ্যখনৰ চেলেম জিলাৰ এগৰাকী ৮৫ বৰ্ষীয় কৃষকে হিন্দী জাপি দিয়াৰ প্ৰতিবাদত ডি এম কেৰ কাৰ্যালয়ৰ বাহিৰত নিজৰ শৰীৰত অগ্নিসংযোগ কৰে। ডি এম কেৰ কৃষি সংঘৰ প্ৰাক্তন সংগঠক থাংগাভেলে আজি পুৱা এই চৰম প্ৰতিবাদী পথ গ্ৰহণ কৰে।

প্ৰকাশিত খবৰ অনুসৰি পুৱা প্ৰায় ১১ বজাত তেওঁ নিজৰ শৰীৰত পেট্ৰল ঢালি জুই লগাই দিয়ে। এনে চৰম প্ৰতিবাদী পথ গ্ৰহণ কৰাৰ ফলত তেওঁ থিতাতে মৃত্যুক সাৱটি লয়। ডি এম কেৰ এগৰাকী সক্ৰিয় সদস্য থাংগাভেলে হিন্দীক শিক্ষাৰ মাধ্যম হিচাপে গ্ৰহণৰ বাবে কেন্দ্ৰই লোৱা পদক্ষেপৰ বাবেই এই পথ নিৰ্বাচন কৰে।

আত্মজাহ কৰাৰ আগতে থাংগাভেলে এখন বেনাৰত লিখে, “মোডী চৰকাৰ, কেন্দ্ৰীয় চৰকাৰ- আমি হিন্দী নিবিচাৰো। আমাৰ মাতৃভাষা তামিল আৰু হিন্দী জ’কাৰৰ ভাষা। হিন্দী ভাষা জাপি দিলে ছাত্ৰ-ছাত্ৰীৰ জীৱনত প্ৰভাৱ পৰিব। হিন্দীৰ পৰা মুক্তি পাওক, হিন্দীৰ পৰা মুক্তি পাওক, হিন্দীৰ পৰা মুক্তি পাওক।”

উল্লেখ্য যে তামিলনাডুৰ শাসকীয় দল ডি এম কে- ই কেন্দ্ৰীয় চৰকাৰে শিক্ষাৰ মাধ্যম হিচাপে হিন্দী ভাষাক গ্ৰহণ কৰিবলৈ লোৱা পদক্ষেপৰ দুৰ্ঘোৰ বিৰোধিতা কৰি আহিছে।

দলটোৰ যুৱ শাখাৰ সম্পাদক তথা মুখ্যমন্ত্ৰী এম কে ষ্টেলিনৰ পুত্ৰ উদয়নিধি ষ্টেলিনে সকীয়াই দিছিল যে যদিহে ৰাজ্যখনৰ ওপৰত হিন্দী ভাষা জাপি দিয়া হয় তেন্তে দিল্লীত বিজেপি নেতৃত্বাধীন কেন্দ্ৰীয় চৰকাৰৰ বিৰুদ্ধে তীব্ৰ প্ৰতিবাদ সাব্যস্ত কৰা হ’ব।

ৰাইজৰ আৱেগক কেন্দ্ৰীয় চৰকাৰে অৱজ্ঞা কৰিলে দলটো বোবা দৰ্শক হৈ নাথাকিব বুলিও ব্যাপক প্ৰতিবাদৰ আয়োজন কৰিছিল ডি এম কে- ই।

সংসদীয় পেনেলে হিন্দীভাষী ৰাজ্যৰ আই আই টিৰ দৰে কাৰিকৰী আৰু অকাৰিকৰী উচ্চ শিক্ষানুষ্ঠানৰ শিক্ষাৰ মাধ্যম দেশৰ অন্যান্য প্ৰান্ততো হিন্দী হ’ব লাগে বুলি পৰামৰ্শ দিয়াৰ পিছতে এই প্ৰতিবাদৰ সূত্ৰপাত ঘটে।