লজ্জানত সমাজ : নগ্ন নৃত্য প্ৰদৰ্শন নকৰাৰ বাবেই হত্যাৰ ভাবুকি মহিলা শিল্পী দলক
সভ্যতাক লজ্জানত কৰা এক ঘটনা পোহৰলৈ অহাৰ পাছতে সম্প্ৰতি ঘটনাটোৱে ৰাজ্যখনৰ সভ্য সমাজক জোকাৰি গৈছে। ছয়গাঁৱৰ আঁচলপাৰাত সংঘটিত হোৱা এই ঘটনাত দৰ্শকৰূপী একাংশ লোকে মহিলা শিল্পীদলক উলংগ নৃত্য কৰাৰ বাবে হেঁচা প্ৰয়োগ কৰিছিল।
ঈদ উপলক্ষে আয়োজন কৰা সাংস্কৃতিক অনুষ্ঠানত গীত পৰিবেশন কৰিবলৈ কেইবাটাও দলক আমন্ত্ৰণ জনোৱা হৈছিল। ইয়াতেই সংঘটিত সেই অবাঞ্চিত তথা নিন্দনীয় ঘটনাটোত একাংশ লোকে মহিলা শিল্পী দলৰ ওপৰত অত্যাচাৰ চলায়।
জানিব পৰা মতে, শ শ উত্তেজিত দৰ্শকে মহিলা শিল্পীক নগ্ন নৃত্য প্ৰদৰ্শন নকৰিলে হত্যাৰ ভাবুকি দিয়ে। শিল্পীৰ দলে কোনোমতে অনুষ্ঠান আয়োজন কৰা ঠাইৰ পৰা পলায়ন কৰি পুৱতি নিশা বকো থানাত আশ্ৰয় লয়।
ইপিনে, ঘটনাৰ পাছতে ততাতয়াকৈ ঘটনাস্থলীত উপস্থিত হয় জোৰশিমলু আৰক্ষী। আৰক্ষীয়ে ঘটনা সন্দৰ্ভত অনুসন্ধান অব্যাহত ৰাখিছে।
আনহাতে, স্থানীয় সূত্ৰই জানিব দিয়ে যে আয়োজক সমিতিয়ে মহিলা শিল্পীসকলক কোঁচ বিহাৰৰ নৃত্য দল বুলি দৰ্শকক টিকট বিক্ৰী কৰিছিল। এই ঘটনাক কেন্দ্ৰ কৰি ইতিমধ্যে বিভিন্ন মহলত তীব্ৰ প্ৰতিক্ৰিয়াৰ সৃষ্টি হৈছে। ঘটনাত জড়িত ব্যক্তিসকলৰ বিৰুদ্ধে প্ৰশাসনে কঠোৰ ব্যৱস্থা গ্ৰহণৰো দাবী তুলিছে সচেতন মহলে।