গুৱাহাটী কমাৰ্চ কলেজৰ আজৱ নীতি! নামভৰ্তিৰ সময়ত বাধ্যতামূলক ৭০০ টকা মূল্য নামঘোষা ক্ৰয়!

মহাপুৰুষ মাধৱদেৱৰ অমৰ সৃষ্টি নামঘোষা। অসমীয়া সমাজ জীৱনত মহাপুৰুষ দুজনাৰ অৱদান আৰু প্রভাৱ আজিও বিৰাজমান। মহাপুৰুষ মাধৱদেৱৰ শ্ৰেষ্ঠ সৃষ্টি নামঘোষাৰ আদৰ তথা শ্ৰদ্ধা অসমীয়া সমাজ-জীৱনত পুৰুষানুক্ৰমে পৰিলক্ষিত হৈছে।

পিছে শেহতীয়াকৈ নামঘোষাৰ ক্ষেত্ৰত ঐতিহ্যমণ্ডিত গুৱাহাটী কমাৰ্চ কলেজৰ এক সিদ্ধান্তই হতবাক কৰিছে সচেতন সমাজক। কলেজ কৰ্তৃপক্ষই কলেজত নামভৰ্তিৰ সময়ত শিক্ষাৰ্থীৰ বাবে বাধ্যতামূলক কৰিছে নামঘোষা ক্ৰয়।

লক্ষণীয়ভাৱে নামঘোষাখনৰ বাবে শিক্ষাৰ্থীসকলে ভৰিবলগীয়া হ’ব ৭০০ টকা মূল্য। কলেজ কৰ্তৃপক্ষৰ এই সিদ্ধান্তক লৈ এতিয়া সৃষ্টি হৈছে তীব্ৰ চাঞ্চল্যৰ। এই সিদ্ধান্তক গৰিহণা দিছে ৰাইজৰ দলৰ ভাতৃ সংগঠন জাতীয় যুৱ বাহিনীয়ে।

এক প্ৰেছ বিবৃতি যোগে জাতীয় যুৱ বাহিনীৰ সভাপতি লক্ষজ্যোতি গগৈয়ে কয়,“আমি সকলোৱে নামঘোষাখনক শ্ৰদ্ধা কৰাৰ লগতে অসমীয়া সমাজৰ প্রতিঘৰ মানুহেই ঘোষাখন ঘৰত ৰাখেই। নামঘোষাখন পঢ়াক লৈ কাৰো আপত্তি নাই।”

“শংকৰ-মাধৱৰ সৃষ্টি আৰু আদৰ্শ আমি জীয়াই ৰাখিব লাগিব। কিন্তু গুৱাহাটী কমাৰ্চ কলেজৰ নামভৰ্তি মাচুলৰ লগত নামঘোষাখন বাধ্যতামূলক কৰাৰ কাৰণ কি? বাধ্যতামূলক কৰি ছাত্ৰ-ছাত্ৰীৰ ওপৰত ৭০০ টকাৰ বোজা জাপি দিব বিচাৰিছে কিয়?”- তেওঁ লগতে কয়।

যিসময়ত সকলো ছাত্ৰ সংগঠনে মাচুল বৃদ্ধিৰ বিৰুদ্ধে প্ৰতিবাদ কৰি আছে, সেই সময়তে অতিৰিক্তভাৱে নামঘোষাৰ নামত ছাত্ৰ-ছাত্ৰীৰ পৰা ৭০০ টকা সংগ্ৰহ কৰাৰ অনুমতি কেনেকৈ লাভ কৰিলে বুলি প্ৰশ্ন কৰে জাতীয় যুৱ বাহিনীৰ সভাপতিগৰাকীয়ে।

“যি সময়ত চৰকাৰখনে বিনামূলীয়া শিক্ষাৰ ওপৰত গুৰুত্ব প্ৰদান কৰিছিল সেই সময়তেই এখন ধৰ্মগ্ৰন্থ ক্ৰয় কৰাৰ নামত ছাত্ৰ-ছাত্ৰীৰ পৰা বাধ্যতামূলক ৭০০ টকাকৈ সংগ্ৰহ কৰাটো কেনে ধৰণৰ কথা? কলেজ কৰ্তৃপক্ষই ছাত্ৰ-ছাত্ৰীক বাধ্যতামূলক ধৰ্মগ্ৰন্থ ক্ৰয় কৰিবলৈ বাধ্য কৰিব পাৰেনে?”– তেওঁ লগতে কয়।

শিক্ষা আৰু ধৰ্মক একাকাৰ নকৰিবলৈ সকলোকে আহ্বান জনোৱাৰ লগতে গুৱাহাটী কমাৰ্চ কলেজ কৰ্তৃপক্ষক এই সিদ্ধান্ত অতি সোনকালে বাতিল কৰিবলৈ দাবী উথাপন কৰে জাতীয় যুৱ বাহিনীয়ে।