বিতর্কিত কষি আইন সম্পৰ্কত সৰ্বোচ্চ ন্যায়ালয়ৰ গুৰুত্বপূৰ্ণ ৰায় : কি ক’লে সৰ্বোচ্চ ন্যায়ালয়ে?

প্ৰায় ঢেৰ মাহ ধৰি দেশৰ ৰাজধানীৰ সীমান্ত অঞ্চলত প্ৰতিবাদৰত বিদ্ৰোহী কৃষকসকলৰ বাবে কিছু সকাহ কঢ়িয়াই আনিছে উচ্চতম ন্যায়ালয়ৰ এক ৰায়ে।

সোমবাৰে দেশৰ সৰ্বোচ্চ ন্যায়ালয়ে কেন্দ্ৰক বিতৰ্কিত তিনিখন কৃষি আইন কাৰ্যকৰীকৰণত স্থগিতাদেশ জাৰি কৰিছে।

সৰ্বোচ্চ ন্যায়ালয়ৰ মুখ্য ন্যায়াধীশৰ খণ্ড বিচাৰপীঠে বিতৰ্কিত কৃষি আইন সম্পৰ্কীয় এক গোচৰৰ শুনানি গ্ৰহণ কৰি কয় যে কেন্দ্ৰই বিতৰ্কিত কৃষি আইনকেইখন কাৰ্যকৰীকৰণ স্থগিত নকৰিলে উচ্চতম ন্যায়ালয়ে নিজেই স্থগিত কৰিবলৈ বাধ্য হ’ব।

“দিনৰ পিছত দিন দিল্লীৰ ৰাজপথত বয়স্ক লোক, মহিলাই আন্দোলন কৰি আছে। চৰকাৰে এই পৰিস্থিতি দেখিও কিয় একো ব্যৱস্থা গ্ৰহণ কৰা নাই?” এই বুলিও দেশৰ শীৰ্ষ আদালতে প্ৰশ্ন কৰে কেন্দ্ৰীয় চৰকাৰক।

কিয় বয়স্ক আৰু মহিলাসকলে আন্দোলনত অংশগ্ৰহণ কৰিছে সেয়া চৰকাৰে জানে নে নাই বুলিও প্ৰশ্ন কৰি মুখ্য ন্যায়াধীশ বোবদে-এ কয়, “আমি আজি পৰ্যন্ত কোনো সুদুত্তৰ পোৱা নাই। পৰিস্থিতি ক্ৰমশঃ সংকটজনক হৈহে গৈ আছে।”

মুখ্য ন্যায়াধীশগৰাকীয়ে লগতে কয় যে “আন্দোলন যাতে নিয়ন্ত্ৰণৰ বাহিৰলৈ গুচি নাযায়। আমি নিজৰ মানুহৰ তেজ চাব নোখোজো আৰু কোনো লোকৰ মৃত্যু আমি চাব নোখোজো।”

ইফালে চৰকাৰী পক্ষৰ আইনজীৱী এটৰ্নী জেনেৰেল কে কে বেণুগোপালে কয় যে মাত্ৰ ৩-৪ খন ৰাজ্যৰ কৃষকেহে এই আন্দোলন কৰিছে।

দেশৰ বৃহৎ সংখ্যক কৃষক এই আন্দোলনৰ পৰা বিৰত আছে বুলি দাবী কৰি তেওঁ কয় যে দক্ষিণ ভাৰতৰ কোনো কৃষকে এই অন্দোলনত অংশগ্ৰহণ কৰা নাই।

উল্লেখ্য যে কেন্দ্ৰৰ তিনিখন বিতৰ্কিত কৃষি আইন বাতিলৰ দাবীত দিল্লী সীমান্তৱৰ্তী অঞ্চলসমূহত প্ৰচণ্ড শীতকো নেওচি দেশৰ হাজাৰ হাজাৰ কৃষকে যোৱা প্ৰায় ডেৰ মাহ ধৰি আন্দোলন কৰি আছে।

উক্ত আন্দোলকালীন সময়ত কৃষক আৰু চৰকাৰৰ মাজত ৮ লানী আলোচনা অনুষ্ঠিত হৈছে যদিও আলোচনাসমূহ সফল হোৱা নাই।