বুমৰাহৰ প্ৰথমটো বলতে ছিক্সাৰ বৈভৱৰ! বৰ্ষাবিঘ্নিত বৰ্ষাপাৰাত ৰানৰ বৰষুণ; মুম্বাইক হৰুৱালে ৰাজস্থানে

মেচখনৰ নিৰ্ধাৰিত সময়ত ধাৰাসাৰ বৰষুণ হয়। প্ৰায় ৩ ঘণ্টা অপেক্ষাৰ অন্তত খেল আৰম্ভ হয়। কিন্তু গুৱাহাটীৰ বৰ্ষাপাৰা ষ্টেডিয়ামত হাজাৰ হাজাৰ দৰ্শকৰ বাবে সেই দীঘলীয়া অপেক্ষা অথলে নগ’ল। যেতিয়াই আকাশত ডাৱৰ পৰিষ্কাৰ হ’ল খেলপথাৰত ৰানৰ বৰষুণ আৰম্ভ হ’ল। বিস্ফোৰক বেটিং খেলখনত শেষ হাঁহি মাৰিলে ৰাজস্থান ৰয়েলছে। পাঁচবাৰৰ চেম্পিয়ন দলটোক ২৭ ৰানত পৰাস্ত কৰিলে।

বৰষুণ বিঘ্নিত মেচখনত মুম্বাই ইণ্ডিয়ানছে আশা কৰা মতে টছত জয়লাভ কৰি ফিল্ডিং কৰাৰ সিদ্ধান্ত লয়। মুম্বাইৰ অধিনায়ক হাৰ্দিকে হয়তো ভবা নাছিল যে বৈভৱ সূৰ্য্যবংশী আৰু যশস্বী জয়ছৱালে প্ৰথমে বেটিং কৰিবলৈ নামি তাণ্ডৱ আৰম্ভ কৰিব। এই দুই অ’পেনাৰে ৰাজস্থানক মাত্ৰ ১৬টা বলত ৫০ ৰানলৈ লৈ যায়।

প্ৰথম অভাৰত বল্টে ২২ ৰান দিয়ে। বৈভৱ সূৰ্যবংশীয়ে প্ৰথম অভাৰতে বুমৰাহৰ বলত দুটা ছয় মাৰে। অৱশ্যে আন বলাৰৰ বিৰুদ্ধেও ছয় মৰাৰ হেঁপাহ কম হোৱা নাছিল। বৈভৱে মাত্ৰ ১৪টা বলত ৫টা ছয়ৰে ৩৯ ৰান সংগ্ৰহ কৰে। আন এজন অ’পেনাৰ যশস্বী জয়ছৱালে আৰু অধিক আক্ৰমণাত্মক ইনিংছ খেলিছিল। তেওঁ মাত্ৰ ৩২টা বলত ৭৭ ৰানৰ অবিশ্বাস্য ইনিংছ খেলিছিল।

অ’পেনাৰ দুজনৰ বিস্ফোৰক ইনিংছৰ জৰিয়তে ৰাজস্থানে নিৰ্ধাৰিত ১১ অভাৰত ১৫০ ৰান সংগ্ৰহ কৰে। ইয়াৰ উত্তৰত মুম্বাইয়ে আৰম্ভণিতে নিজৰ ছন্দ হেৰুৱাই পেলালে। প্ৰথম অভাৰত ৰিকলটন আউট হৈছিল। সূৰ্য্য আৰু ৰোহিতেও বিশেষ একো কৰিব নোৱাৰিলে। দৰাচলতে বিশাল ৰানৰ চাপত মুম্বাইৰ টপ অৰ্ডাৰ তাচপাতৰ ঘৰৰ দৰে খহি পৰিল।

এটা সময়ত মুম্বাই ৰানৰ হাৰ বজাই ৰাখিবলৈ চেষ্টা কৰি মাত্ৰ ৪৬ ৰানত ৫ উইকেট হেৰুৱাই যথেষ্ট চাপত পৰিছিল। তাৰ পৰাই ৰাদাৰফোৰ্ড আৰু নমন ধীৰে পাৰ্টনাৰশ্বিপ গঢ়ি মুম্বাইক পুনৰ মেচলৈ ঘুৰাই আনে। যদিও দুয়োৰে কোনোৱেই ডাঙৰ ইনিংছ খেলিব নোৱাৰিলে। দুয়োজনেই ২৫ ৰানত আউট হৈছিল। সেই যুটিৰ পতনৰ লগে লগে মুম্বাইৰ সকলো আশা শেষ হৈ গ’ল। শেষত শাৰ্দুল ঠাকুৰহঁতৰ দলটোৱে ১২৩ ৰান সংগ্ৰহ কৰে। ৰাজস্থানে ২৭ ৰানত জয়লাভ কৰে।

সংক্ষিপ্ত স্কোৰঃ

ৰাজস্থানঃ ১৫০-৩ (যশস্বী ৭৭, বৈভৱ ৩৯)

মুম্বাইঃ ১২৩-৯ (ধীৰ ২৫, ৰাদাৰফোৰ্ড ২৫)

ৰাজস্থানে ২৭ ৰানত জয়লাভ কৰে।