কলেজৰ প্ৰবক্তাই ধৰ্ষণ কৰিলে দশম শ্ৰেণীৰ ছাত্ৰীক! : অভিযুক্ত প্ৰৱক্তা প্ৰবীণ নাৰ্জাৰীক গ্ৰেপ্তাৰ আৰক্ষীৰ
অৱশেষত বেংতলৰ নাবালিকা ছাত্ৰীক ধৰ্ষণ কৰি মৃত্যু মুখলৈ ঠেলি দিয়াৰ অভিযোগত আজি গ্ৰেপ্তাৰ কৰা হ’ল বেংতল কলেজৰ প্ৰবক্তা প্ৰবীণ নাৰ্জাৰীক।
দুৰ্ভগীয়া ছাত্ৰীগৰাকীৰ পৰিয়ালে দাখিল কৰা এজাহাৰৰ ভিত্তিত ৰুণীখাতা থানাত ২৯/২০২১ নং গোচৰ ৰুজু কৰা হয় আৰু ভাৰতীয় দণ্ডবিধিৰ দফা ৩৭৬(৩),২০১,৩০৬ আৰু শিশু যৌন নিৰ্যাতন প্ৰতিৰোধ আইন (পকছ’)ৰ অধীনত আৰক্ষীয়ে অভিযুক্ত প্ৰবক্তা প্ৰবীণ নাৰ্জাৰীক গ্ৰেপ্তাৰ কৰে।
আৰক্ষীয়ে অভিযুক্ত প্ৰৱক্তাগৰাকীক কাজলগাঁৱৰ জিলা সত্ৰ ন্যায়াধীশৰ আদালতত হাজিৰ কৰি পাঁচ দিনৰ বাবে জিম্মাত বিচাৰে যদিও আদালতে প্ৰবীণ নাৰ্জাৰীক তিনিদিনৰ কাৰণে আৰক্ষীৰ জিম্মালৈ প্ৰেৰণ কৰে।
প্ৰৱক্তা প্ৰবীণ নাৰ্জাৰীয়ে অতিকৈ দৰিদ্ৰ পৰিয়ালৰ সম্পৰ্কত খুলশালী কিশোৰীগৰাকীক পঢ়া-শুনাৰ বাবে নিজৰ ঘৰত ৰাখিছিল আৰু আশ্ৰয়দাতা প্ৰবীণ নাৰ্জাৰীয়ে নিজৰ ঘৰতে দশম শ্ৰেণীৰ কিশোৰী ছাত্ৰীগৰাকীক ধৰ্ষণ কৰে।
ইয়াৰ পিছতে ভুক্তভোগী কিশোৰীগৰাকীয়ে প্ৰবীণ নাৰ্জাৰীয়ে তেওঁক ধৰ্ষণ কৰিছে আৰু সেয়া তেওঁ সহজভাৱে মানি ল’ব নোৱাৰি লাজ অপমানতে মৃত্যুৰ পথ বাছি ল’বলৈ বাধ্য হৈছে বুলি চুইছাইড নোট লিখি নিজৰ প্ৰেমিকলৈ প্ৰেৰণ কৰি প্ৰবীণ নাৰ্জাৰীৰ ঘৰতে ফাঁচি লগাই আত্মহত্যা কৰে।
কিশোৰীগৰাকীয়ে আত্মহত্যা কৰাৰ পিছতে প্ৰেমিকে সমগ্ৰ ঘটনাটো ৰাজহুৱা কৰে আৰু অভিযুক্ত প্ৰৱক্তা নাৰ্জাৰীৰ বিৰুদ্ধে কিশোৰীগৰাকীৰ পৰিয়ালৰ লোক আৰক্ষীৰ দ্বাৰস্থ হয়।
ইফালে নাবালিকা ছাত্ৰী গৰাকীৰ আত্মহত্যা কৰা ঘটনাটো গাপ দিয়াৰ কাৰণে ষড়যন্ত্ৰত লিপ্ত হয় অভিযুক্ত প্ৰবক্তাগৰাকী। কিন্তু সংবাদ মাধ্যম আৰু আৰক্ষীৰ তৎপৰতাত সকলো ষড়যন্ত্ৰ বিফল হয় আৰু আৰক্ষীয়ে কালিয়ে সোধপোছৰ বাবে প্ৰবীণ নাৰ্জাৰীক আটক কৰি তদন্ত আৰম্ভ কৰে আৰু আজি পুৱা আনুষ্ঠানিক ভাৱে গ্ৰেপ্তাৰ কৰে।
আনহাতে কালি বেংতল-টুক্ৰাঝাৰত দশম শ্ৰেণীৰছাত্ৰী গৰাকীৰ ধৰ্ষণ আৰু আত্মহত্যাৰ কৰা ঘটনাটোক লৈ আজি বিভিন্ন দল সংগঠনে প্ৰতিক্ৰিয়াৰ ব্যক্ত প্ৰকাশ কৰি অভিযুক্ত প্ৰৱক্তাগৰাকীৰ উচিত শাস্তিৰ দাবী কৰিছে।
এই সংক্ৰান্তত আজি বেংতল আঞ্চলিক এবছুৰ সভাপতি সুশীল ইছলাৰী, সম্পাদক পুৰ্ণ সিং বসুমতাৰী আৰু চিৰাং জিলা এবছুৰ শিক্ষা সম্পাদক টেবাশ্ৰৌন ব্ৰহ্মৰ উপস্থিতিত এখন সংবাদ মেলৰ আয়োজন কৰি উক্ত ঘটনাৰ তীব্ৰ ভাষাত গৰিহণা দিয়ে লগতে ছাত্ৰীগৰাকীৰ এই দুৰ্ভাগ্যজনক মৃত্যুত গভীৰ শোক প্ৰকাশ কৰে।
চিৰাং জিলা ট্ৰাইবেল সংঘই সভ্য সমাজক লজ্জানত কৰা এই জঘন্য ঘটনাৰ এক নিৰপেক্ষ তদন্ত দাবী কৰে লগতে আইনমতে বিচাৰ কৰি দোষী ব্যক্তিজনৰ দৃষ্টান্তমূলক শাস্তি প্ৰদান কৰাৰ দাবী কৰিছে।
তদুপৰি দুয়োটা সংগঠনে ভুক্তভোগী ছাত্ৰীগৰাকীৰ পৰিয়ালক চৰকাৰ তৰফৰ পৰা এককালীন আৰ্থিক সাহায্য প্ৰদান কৰাৰো দাবী উত্থাপন কৰিছে।