কেতিয়াও কল্পনাও কৰা নাছিল এনে চৰিত্ৰ; ‘এনিমেল’ ছবিখনক লৈ অধীৰ অপেক্ষাত ৰশ্মিকা

ৰশ্মিকা মন্দানাই  আৰু অপেক্ষা কৰিব পৰা নাই। তেওঁ ‘এনিমেল’ ছবিখনত নতুন ৰূপেৰে সকলোকে আচৰিত কৰি তুলিব বিচাৰে। তেওঁৰ নতুন ৰূপটো দেখি সকলোৱে কি কয় চাব ​​বিচাৰে। শেহতীয়াকৈ এক সাক্ষাৎকাৰত ৰশ্মিকাই ছবিখনক লৈ নিজৰ অনুভৱ ব্যক্ত কৰিছে।

এক সাক্ষাৎকাৰত ৰশ্মিকাই উচ্ছ্বসিতভাৱে ‘এনিমেল’ৰ বিষয়ে কয়, ‘মই আগ্ৰহেৰে অপেক্ষা কৰি আছো, কেতিয়া দৰ্শকে মোৰ এই ছবিখন চাব। তেওঁলোকৰ প্ৰতিক্ৰিয়া জানিবলৈ মই অধিক উদ্বিগ্ন হৈ পৰিছো। এই ছবিখনত মোৰ চৰিত্ৰ সম্পূৰ্ণ বেলেগ। এনে ভূমিকা ৰূপায়ন কৰাৰ কথা আগতে কেতিয়াও কল্পনা কৰা নাছিলো। সমালোচক আৰু অনুৰাগীয়ে কেনে প্ৰতিক্ৰিয়া প্ৰকাশ কৰিব সেয়া চাবলৈ ৰৈ থাকিব পৰা নাই।’

কবীৰ সিং ছবিৰে বক্স অফিচত ধুমুহাৰ সৃষ্টি কৰা সন্দীপ ৰেড্ডী ভাংগাৰৰ দ্বিতীয়খন হিন্দী চিনেমা ‘এনিমেল’।

ছবিখনত ৰশ্মিকা আৰু ৰণবীৰ কাপুৰক যুটি হিচাপে দেখা যাব। এই ছবিখনৰ চেটৰ কিছু ছবি ইতিমধ্যে ভাইৰেল হৈ পৰিছে। ছবিখনত সম্পূৰ্ণ নতুন চৰিত্ৰত দেখা যাব ৰণবীৰকো। চলিত বৰ্ষৰ ডিচেম্বৰ মাহত ছবিখন মুক্তি পোৱাৰ সম্ভাৱনা আছে। ৰশ্মিকা ছবিখনক লৈ বৰ আশাবাদী।

ইয়াৰ কাৰণ ব্যাখ্যা কৰি এই দক্ষিণৰ তাৰকা অভিনেত্ৰীগৰাকীয়ে কয়, ‘ডিচেম্বৰ মাহ মোৰ বাবে সদায় ভাগ্যৰ মাহ। মোৰ প্ৰথম ছবি “কিৰিক পাৰ্টি”ৰ পৰা আৰম্ভ কৰি “পুষ্পা”, “চমক” আৰু “অঞ্জনী পুত্ৰ” ডিচেম্বৰ মাহত মুক্তি পোৱা চিনেমা। ডিচেম্বৰ মাহত মুক্তি পোৱা ছবি কেইখনৰ বাবে সকলোৰে পৰা মৰম পাইছিলোঁ। ডিচেম্বৰ মাহত মুক্তি পাবলগীয়া মোৰ পঞ্চমখন ছবি এনিমেল। সেয়ে, ছবিখনক লৈ মই অধিক উৎসাহিত।

‘এনিমেল’ৰ বাহিৰেও ৰশ্মিকাক পৰৱৰ্তী সময়ত দেখা যাব ‘পুষ্পা ২’ত। ‘ৰেইনবো’ নামৰ আন এখন ছবিতো তেওঁ অভিনয় কৰিছে। তামিলৰ উপৰিও ৰশ্মিকাই তেলেগু, কানাড়া ছবিতো কাম কৰি আহিছে।

ইয়াৰ উপৰিও ৰশ্মিকাই সিদ্ধাৰ্থ মালহোত্ৰাৰ সৈতে যুটি বান্ধিছিল ‘মিছন মজনু’ ছবিত। অ’টিটি প্লেটফৰ্ম নেটফ্লিক্সত মুক্তি লাভ কৰিছিল ছবিখন।

গুডবাই ছবিৰ জৰিয়তে বলীউডতো নিজৰ যাত্ৰা আৰম্ভ কৰিছে ৰশ্মিকাই। ছবিখনত অমিতাভ বচ্চন আৰু নীনা গুপ্তাৰ দৰে শিল্পীয়ে অভিনয় কৰিছিল।