পাকিস্তানৰ কৰাচীত প্ৰাচীন হনুমান মন্দিৰসহ ২০ হিন্দু পৰিয়ালৰ বাসগৃহ ধ্বংস : চাওক llVIDEOll

ক্ৰমাৎ ধৰ্মোদ্মাদ বৃদ্ধি পাইছে দেশে বিদেশে। যেন পাহৰি গৈছে মানৱতাই পৰম ধৰ্ম! কি জনতা! কি শাসক! সকলোৱে যেন একে পথৰে পথিক!

বিশ্বত ক’ৰ’নাই মানৱ সভ্যতালৈ নমাই অনা দুৰ্যোগৰ মাজতো ভাৰত, পাকিস্তান, তুৰস্ক আদি কিছুমান দেশত বৃদ্ধি পায়ে আছে সাম্প্ৰদায়িক মনোবৃত্তি।

কিছুদিন পূৰ্বে কোভিড সন্ত্ৰাসৰ মাজতে ভাৰতত প্ৰধানমন্ত্ৰী নৰেন্দ্ৰ মোদীৰ দ্বাৰা ভূমি পূজন কৰা হ’ল ৰাম মন্দিৰৰ। উল্লেখ্যে যে এই ৰাম মন্দিৰ নিৰ্মাণ কৰা হৈছে কেবা শতিকাজুৰি থিয় দি থকা বাবৰি মছজিদক ধ্বংস কৰি।

ইয়াৰ কিছুদিন পূৰ্বে তুৰস্কত এটা ঐতিহাসিক গীৰ্জাক মছজিদলৈ ৰূপান্তৰ কৰিছে দেশখনৰ শাসকে।

কোভিড সন্ত্ৰাসৰ মাজতে সেই তুৰস্কৰে বন্ধু ৰাষ্ট্ৰ পাকিস্তানৰ কৰাচীস্থিত হিন্দুসকলৰ ঐতিহ্যপূৰ্ণ এটা হনুমান মন্দিৰ ধ্বংস কৰা হৈছে।

Ancient Hanuman Mandir Liyari Karachi Sindh was destroyed in a night by a Pathan settler and he building a house . Ancient antiques and valuable statues are missing . #StopDestroyingMandirs #stopReligiousOppression @pragnabharati @TarekFatah @USCIRF @State_SCA @StateDept @ANI pic.twitter.com/SjUXCrtpLY

— Zafar Sahito (@widhyarthi) August 17, 2020

কৰাচী চহৰৰ লিয়াৰি অঞ্চলত অৱস্থিত প্ৰাচীন হনুমাদ মন্দিৰটো ভাঙি দিয়া হৈছে বুলি প্ৰকাশ পাইছে পাক সংবাদ মাধ্যমত।

ইমানেই নহয়, মন্দিৰৰ আশে পাশে থকা ২০ টা হিন্দু পৰিয়ালৰ বাসগৃহও ভাঙি দিয়া হৈছে বুলি দাবী কৰিছে পাক সংবাদ মাধ্যমে।

স্থানীয় হিন্দু লোকৰ উদ্ধৃতিৰে পাক সংবাদ মাধ্যমসমূহে প্ৰকাশ কৰিছে যে, উক্ত হিন্দু মন্দিৰটোৰ চাৰিও কাষৰ ভূমি ক্ৰয় কৰি এজন নিৰ্মাতাই তাত এক বৃহ আট্টালিকা নিৰ্মাণ কৰিবলৈ বিচাৰিছে।

নিৰ্মাতাজনে স্থানীয় হিন্দু লোকসকলক প্ৰতিশ্ৰুতি দিছিল যে তাত থকা হনুমান মন্দিৰটোৰ কোনো ধৰণৰ ক্ষয়-ক্ষতি কৰা নহয়, মন্দিৰটো নিৰাপদে থাকিব।

কিন্তু কোভিড মহামাৰীৰ বাবে দেশখনত লকডাউন চলি থকাৰ সময়তে উক্ত নিৰ্মাতাজনে বুলড’জাৰেৰে প্ৰাচীন হনুমান মন্দিৰটোৰ লগতে তাৰ আশে পাশে থকা ২০ টা হিন্দু পৰিয়ালৰ বাসগৃহও ভাঙি পেলাইছে।

ইয়াৰ পিছতে স্থানীয় হিন্দুসকল এই কাৰ্যৰ বিৰুদ্ধে প্ৰতিবাদমুখৰ হৈ উঠিছে। প্ৰাচীন মন্দিৰটোৰ ধ্বংসস্তুপৰ চাৰিও কাষে স্থানীয় হিন্দু লোকসকলে প্ৰতিবাদ সাৱ্যস্ত কৰে।

প্ৰতিবাদৰ পিছতে স্থানীয় আৰক্ষীয়ে পৰিস্থিতি শান্ত কৰোৱাৰ স্বাৰ্থত উক্ত নিৰ্মাণ কাৰ্য বন্ধ কৰিবলৈ নিৰ্দেশ দিয়াৰ লগতে বিবাদমান অঞ্চলটো ছীল কৰি দিছে।

ইফালে পাক প্ৰশাসনৰ এক প্ৰশাসনিক বিষয়াই কৈছে যে, উক্ত অঞ্চলটোত এটাই নহয় দুটা হিন্দু মন্দিৰ আছিল আৰু পূৰ্বে এটা মন্দিৰ ধ্বংস কৰা হৈছিল।

ইফালে স্থানীয় হিন্দুসকলৰ প্ৰতিবাদৰ ফলস্বৰূপে প্ৰশাসনে নিৰ্মাতাৰ বিৰুদ্ধে তদন্ত আৰম্ভ কৰাৰ লগতে হিন্দুসকলক সুৰক্ষা দিয়া হ’ব বুলি প্ৰকাশ কৰিছে।