IPL 2024: মুখৰ কথা নহয়! টী-২০ত হাফ চেঞ্চুৰীৰ চেঞ্চুৰী, কোহলীৰ ‘বিৰাট’ অভিলেখ; বেংগালুৰুৰ হাতত পৰাস্ত পঞ্জাৱ
বিৰাট কোহলী মানেই অভিলেখৰ পিছত অভিলেখ। এইবাৰৰ আই পি এলৰ পূৰ্বে তেওঁ ইংলেণ্ডৰ বিৰুদ্ধে পাঁচখন টেষ্টৰ শৃংখলাত খেলা নাছিল। শেষবাৰৰ বাবে আফগানিস্তানৰ বিৰুদ্ধে টী-২০ ফৰ্মেটত খেলিছিল। তাকো কেইমাহমান হ’ল। সেই কোহলীয়ে সোমবাৰে আৰচিবিক বিজয়ী কৰিলে। ছচিয়েল মিডিয়াত লিখা হৈছে “হোলী কোহলী হায়”। কোহলীয়ে পঞ্জাৱৰ বিৰুদ্ধে ৰানৰ হোলী খেলিছিল!
পঞ্জাৱক পৰাস্ত কৰাৰ পথত কোহলীয়ে কেচ ধৰি এক অভিলেখ গঢ়ি তুলিছিল। কোহলীয়ে টী-২০ ফৰ্মেটত ১৭৩টা কেচ ধৰা প্ৰথম ভাৰতীয় খেলুৱৈ হিচাপে পৰিগণিত হয়। তেওঁ ‘মিষ্টাৰ আই পি এল’ সুৰেশ ৰাইনাক অতিক্ৰম কৰিলে।
বেটৰেও তেওঁ অভিলেখ গঢ়িলে। সোমবাৰৰ দিনটোতে কোহলীয়ে অৰ্ধ শতকৰ শতক (হাফ চেঞ্চুৰীৰ চেঞ্চুৰী) অৰ্জন কৰে। ভাৰতীয় হিচাপে এনে অভিলেখ কাৰো নাই। কোহলীতকৈ আগবাঢ়ি আছে মাত্ৰ ক্ৰীছ গেইল (১১০) আৰু ডেভিড ৱাৰ্নাৰ (১০৯)। ইয়াৰ পিছতে কোহলী (১০০)।
চেছমাষ্টাৰ বিৰাট কোহলীয়ে চলিত আই পি এলত প্ৰথমটো অৰ্ধ শতক অৰ্জন কৰে। আৰ চি বি অ’য়ে প্ৰথম জয় লাভ কৰে। বিৰাট ধ্বনিত কঁপি উঠিল গেলেৰী। পঞ্জাৱৰ বলাৰসকলে বুজিবই পৰা নাছিল যে তেওঁক কোনটো লেংথত বলিং কৰিব।
বেংগালুৰুৱে টছত জয়লাভ কৰি পঞ্জাবক প্ৰথমে বেটিং কৰিবলৈ পঠিয়ায়। পঞ্জাৱৰ জনী বেয়াৰষ্টো, শিখৰ ধাৱান, লিভিংষ্টোনৰ দৰে বেটছমেন আছে। পঞ্জাবে ধৱন (৪৫), প্ৰৱসীমৰণ (২৫), কুৰাণ (২৩), জিতেশ শৰ্মা (২৭)ৰ সৌজন্যত ১৭৬ ৰান সংগ্ৰহ কৰে।
এই ৰানটো টী-২০ ফৰ্মেটত বেয়া বুলি কব নোৱাৰি। আৰম্ভণিতে উইকেট ল’ব পাৰিলে প্ৰতিপক্ষক হেঁচাত ৰাখিব পাৰি। তাৰ ওপৰত পঞ্জাৱত ৰাবাডাৰ দৰে বলাৰ আছে। যিকোনো মুহূৰ্ততে তেওঁ মেচৰ ৰং সলনি কৰিব পাৰে।
আৰম্ভণিতে আৰ চি বিৰ উইকেট দ্ৰুতগতিত পতন ঘটে। ডু প্লেচি (৩), কেমেৰন গ্ৰীণ (৩), গ্লেন মেক্সৱেল (৩) কম ৰাণতে উভতি যায় যদিও বিৰাট কোহলীয়ে আন এক অৱতাৰত ধৰা দিলে। তেওঁ মাত্ৰ ৪৯টা বলত ৭৭ ৰান সংগ্ৰহ কৰে। তেওঁৰ ইনিংছত আছিল ১১টা চাৰি আৰু ২টা ছয়।
ঠিক যেতিয়া এনে লাগিছিল যে কোহলীয়ে অকলেই মেচখন শেষ কৰি পেভলিয়নলৈ ঘূৰি আহিব, তেতিয়াই কাহিনীত টুইষ্ট দেখা যায়। হৰ্শল পেটেলৰ বলত হৰপ্ৰীত ব্ৰাৰে তেওঁৰ কেচ ধৰিলে। ইয়াৰ পিছত পুনৰ উইকেট হেৰুৱালে বেংগালুৰুৱে। কুৰানে অনুজ ৰাৱটক পুনৰ শুন্য ৰাণতে পঠিয়াই দিলে।
হঠাৎ আৰ চি বিৰ অনুৰাগীৰ ধ্বনি নিস্তেজ হৈ পৰিল। মেচখনত পৰাস্ত হোৱাৰ আশংকা প্ৰৱেশ কৰে আৰ চি বিৰ ড্ৰেছিং ৰুমতো। কোহলীৰ এনে দুৰ্দান্ত ইনিংছৰ পাছতো মেচত পৰাস্ত হ’ব লাগিব? এনে এটা প্ৰশ্নই অনুৰাগীৰ মনত এক ধুমুহাৰ সৃষ্টি কৰিলে।
কিন্তু চাপত পৰি কাৰ্তিক আৰু মহিপালে বেলেগ চিন্তাই কৰিছিল। আৰচিবিক পুনৰ যুঁজলৈ আনিলে। এই ক্ষেত্ৰত দীনেশ কাৰ্তিকে ফিনিছাৰৰ ভূমিকা গ্ৰহণ কৰে। শেষৰ অভাৰত জয়ী হ’বলৈ বেংগালুৰুৰ প্ৰয়োজন হৈছিল ১০ ৰানৰ। কাৰ্তিকে নিজৰ স্বকীয় শৈলীত ছয় মাৰি আৰচিবিক মেচখনত জিকাই দিয়ে।
সংক্ষিপ্ত স্কোৰঃ
পঞ্জাৱ কিংছঃ ১৭৬/৬ (ধৱন-৪৫, জিতেশ-২৭)
আৰ চি বি : ১৭৮/৬ (কোহলী-৭৭, কাৰ্তিক-২৮*)
আৰ চি বিয়ে ৪ উইকেটত জয়লাভ কৰে।