‘ফিফা’ স্বীকৃতিপ্ৰাপ্ত বদৌচা কাপ ফুটবলৰ ডাক খাম উন্মোচন

পোন প্ৰথমবাৰৰ বাবে আন্তঃৰাষ্ট্ৰীয় পৰ্যায়ত আয়োজন কৰিবলৈ লোৱা দশম সংখ্যক আন্তঃৰাষ্ট্ৰীয় আমন্ত্ৰণমূলক ফুটবল প্ৰতিযোগিতা বদৌচা কাপ ২০১৮ উপলক্ষে মঙলবাৰে তিনিচুকীয়া ডাক সংমণ্ডলৰ জৰিয়তে বিশেষ খাম উন্মোচন কৰা হয়।

ডাক বিভাগৰ তিনিচুকীয়া সংমণ্ডলৰ মুখ্য কাৰ্যালয়ৰ অধীক্ষক বিজয়ানন্দ হাজৰিকাৰ পৌৰোহিত্যত অনুষ্ঠিত সভাখনতে এই বিশেষ খামটো উন্মোচন কৰা হয়। সভাখনৰ আঁ‌ত ধৰে বিভাগীয় কৰ্মচাৰী দুলাল শৰ্মাই।

সভাত বদৌচা  স্প’টছ ক্লাবৰ উপদেষ্টা শংকৰ গুপ্তা, সভাপতি অৰুণজ্যোতি মৰাণ, উপ-সভাপতি নীলকান্ত ফুকন, মৰাণ ছাত্ৰ সন্থাৰ ভাৰপ্ৰাপ্ত সাধাৰণ সম্পাদক হেম বৰুৱা উপস্থিত থাকে।

উল্লেখ্য যে অহা ৯ ছেপ্টেম্বৰৰ পৰা তিনিচুকীয়াৰ লগতে মাজুলি, মাৰ্ঘেৰিটা, শদিয়া, ডুমডুমা আৰু ডিগবৈত অনুষ্ঠিত হ’ব লগা প্ৰতিযোগিতাখনত বাংলাদেশ আৰু নেপালৰ শীৰ্ষ পৰ্যায়ৰ দলেও অংশগ্ৰহণ কৰা পৰিলক্ষিত হ’ব।

ফিফা আৰু এছিয়ান ফুটবল সন্থাই ইতিমধ্যে স্বীকৃতি প্ৰদান কৰা প্ৰতিযোগিতাখন মুখ্য মন্ত্ৰী সৰ্বানন্দ সোণোৱালে মাজুলীত অহা ৯ ছেপ্তেম্বৰত উদ্বোধন কৰিব।