সম্প্ৰীতিৰ অসম। দামোদৰদেৱৰ তিথিত ছয়লাখ লাড়ু তৈয়াৰীত সহায় ছকুৰি মুছলমান পৰিয়ালৰ

“সাম্প্ৰদায়িক সম্প্ৰীতি” ৰক্ষাত কেইবাদশকজুৰি দেশে মূল্য ভৰি অহাৰ মাজতো সেউজ মৰুদ্যানৰ দৰে জিলিকি ৰোৱা উত্তৰ-পূবৰ অসমত আজিও সজীৱ হৈ ৰৈছে ধৰ্মীয় সদ্ভাৱনাৰ এক চিৰকলীয়া নিদৰ্শন।

ভিন্ন ধৰ্মৰ মিলনভূমি হাজোত দেওবাৰে উদযাপিত মহাপুৰুষ শ্ৰী শ্ৰী দামোদৰদেৱৰ তিথি-জৰিত লাড়ু উৎসৱত ভক্তৰ বাবে প্ৰস্তুত ৬লাখ লাড়ু তৈয়াৰীত অঞ্চলটোৰ ছকুৰি (সঠিক ১২৩টা) মুছলমান পৰিয়ালেও আগবঢ়ায় সহায়ৰ হাত।

চাৰি শতিকাজুৰি হাজোৰ ৰামদিয়াৰ পোৰাভিঠা সত্ৰত চলি অহা এই উৎসৱত দিয়া-লোৱাত কাৰ্পণ্য নাই হিন্দু-মুছলমানৰ। মুছলমানৰ সহযোগৰ বাবে উন্মুক্ত, উদাৰ হিন্দু আৰু হিন্দুক সহায়ৰ বাবে দুয়োহাত মুক্ত মুছলমানৰ!

বছৰ ধৰি বাট চাই ৰোৱা লাড়ু উৎসৱত এইবাৰো এপষেক আগৰ পৰাই স্থানীয় লোকসকলে চলাইছিল ব্যাপক প্ৰস্তুতি। প্ৰায় ২০০ কুইণ্টল চাউল আৰু ৪০০ কুইণ্টল গুৰেৰে প্ৰস্তুত কৰা হৈছিল ৬ লাখ লাড়ু।

দেওবাৰে হেঁপাহৰ দিনটোত হাজাৰ-হাজাৰ ভক্তৰে উপচি পৰে পোৰাভিঠা সত্ৰ। জনসমুদ্ৰৰ সমানে পোৰাভিঠাত আছিল লাড়ুৰ পাহাৰ।

মহাপুৰুষ দামোদৰদেৱৰ তিৰোভাৱ তিথি উপলক্ষে এই সমন্বয়ৰ উৎসৱ উদযাপন কৰি অহা সত্ৰখন মানে পুৰি পেলাইছিল। সেয়ে বোলে ইয়াৰ নাম হ’ল পোৰাভিঠা।