প্ৰখ্যাত উৰ্দু কবি মুনাৱাৰ ৰাণাৰ দেহাৱসান
শাৰীৰিক অসুস্থতাৰ সৈতে দীৰ্ঘদিনীয়া যুঁজৰ অন্তত অৱশেষত কালি দেহাৱসান ঘটে উৰ্দু সাহিত্যৰ প্ৰখ্যাত কবি মুনাৱাৰ ৰাণাৰ। মৃত্যুৰ সময়ত তেওঁৰ বয়স আছিল ৭১ বছৰ।
উত্তৰ প্ৰদেশৰ সঞ্জয় গান্ধী স্নাতকোত্তৰ চিকিৎসা বিজ্ঞান প্ৰতিষ্ঠানত চিকিৎসাধীন অৱস্থাতে মৃত্যু হয় প্ৰখ্যাত সাহিত্যিকগৰাকীৰ। তেওঁ দীৰ্ঘদিন ধৰি কৰ্কট ৰোগত আক্ৰান্ত আছিল।
মুনাৱাৰ ৰাণাৰ সন্তান সুমাইয়া ৰাণাই সংবাদ মাধ্যমৰ আগত দেওবাৰে নিশা চিকিৎসালয়ত পিতৃৰ মৃত্যু হোৱা বুলি সদৰী কৰাৰ লগতে আজি তেওঁৰ অন্ত্যেষ্টিক্রিয়া সম্পন্ন হ’ব বুলি জানিবলৈ দিয়ে।
পৰিয়ালে সদৰী কৰা মতে অসুস্থতাৰ বাবে পিতৃ মুনাৱাৰ ৰাণাক ১৫ দিন পূৰ্বে চিকিৎসালয়ত ভৰ্তি কৰোৱা হৈছিল। কালি নিশা প্ৰায় ১১ বজাত তেওঁ শেষ নিশ্বাস ত্যাগ কৰে।
উৰ্দু সাহিত্যত এক সুকীয়া স্থান দখল কৰা মুনাৱাৰ ৰাণাই নিজৰ সৃষ্টিত হিন্দী আৰু অৱধি শব্দ ব্যৱহাৰ কৰিছিল আৰু পাৰ্চী-আৰবী ভাষাক পৰিহাৰ কৰি চলিছিল।
ইয়াৰ ফলত তেওঁৰ কবিতাই সমগ্ৰ ভাৰতীয় পাঠকক আকৃষ্ট কৰিছিল। ২০১৪ চনত মুনাৱাৰ ৰাণাক সাহিত্য অকাডেমি বঁটাৰে সন্মানিত কৰা হৈছিল।
কিন্তু দেশত বৰ্ধিত অসহিষ্ণুতা তথা চৰকাৰৰ প্ৰত্যক্ষ পৃষ্ঠপোষকতাত সাম্প্ৰদায়িকতা বৃদ্ধি পোৱাৰ অভিযোগত প্ৰায় এবছৰ পিছত তেওঁ সাহিত্য অকাডেমি বঁটা ঘূৰাই দিয়ে।
অকাডেমি সন্মান ঘূৰাই দিয়াৰ লগতে একে কাৰণতে পুনৰ কেতিয়াও চৰকাৰী বঁটা গ্ৰহণ নকৰাৰ প্ৰতিশ্ৰুতি দিছিল প্ৰখ্যাত সাহিত্যিকগৰাকীয়ে।